International Literacy Day 2025 hman a ni
Nimin September 8, 2025 khan ‘International Literacy Day 2025’ lawmna neih niin ziak leh chhiar thiam hlutzia leh a pawimawhna inzirtirna neih a ni.
School Education Department hnuaia Adult Education Wing buatsaiha Directorate of School Education Conference Hall, Aizawl-a he hun hman hi Home Minister K. Sapdanga chuan khuallian nia hmanpuiin ULLAS booklet, Meichher Digitization leh Meichher Golden Jubilee 2025 Special Edition & Souvenir te a tlangzarh nghal a, Minister chuan Meichher buatsaihtute chuan ziak mite cho chhuahna rilru pu-a thu tha hmanga hmasawnna kawng a tam thei ang berin an chhiar theih nana an thahnem ngaihna te chu an hlawhtlinna chhan nia a ngaih thu a sawi a, rual u zawk te chu thangthar ten hmasawnna nghet an neihna tura kaihruai tura fuihin, tunlai khawvel chu Digital Era-ah kan chen tawh thu a sawi a. Kumin thupui ‘Promoting literacy in the digital area’ a nih angin Digital Publication tlangzarh a ni chu a inrem hle tih a sawi a. Internet khawvelah kan chen hnuin digital media atanga kan duh zawng koh chhuah mai a awlsam tawh thu sawiin, literacy digital publication chu khawvela literacy-in a thlen san theih ber nia a hriat thu Minister chuan a sawi bawk.Nimin-a he hun hman hi School Education Department Director Angela Zothanpuii chuan kaihruaiin School Education Minister Dr. Vanlalthlana’n ‘International Literacy Day 2025’ thuchah a ziak chu chhiar chhuah a ni a. Khuallian bakah hian T.C. Lalremsiama, Asst. Director, Adult Education leh R. Lalrawna, Meichher sulsutu leh Padma Shree Awardee ni bawk ten thu an sawi bawk.
International Literacy Day, 2025 puala New Delhi Janpath Road-a hun hman hi School Education Minister Dr. Vanlalthlana chuan chhimin thu a sawi a. Mizoram in ziak leh chhiar lama bul kan tan dan te sawiin, hawrawp kan neih theih nachhan leh ziak leh chhiar kan thiam chhan chu British lal hun laia Christian Missionary-te vang a nih thu a sawi a. Ziak leh chhiar chu inzirtir chhawng zelin India ramin British laka Independence kan neih hnu khan ziak leh chhiar thiam kan pun theih na pawimawh tak pakhat, Adult Education Wing a rawn din thu a sawi a. He Wing hian New India Literacy Programme (NILP) tan nasa taka hma lain kum 2022-23 khan 96.41% lai mai literacy rate kan neih theih tak thu a sawi bawk a. Heng hmalakna hrang hrangte zarah hian MoSPI hnuaia Periodic Labour Survey Force Annual Report chuan July 2023- June 2024 chhung khan Mizoram-a awm kum 7 chin chunglam ziak leh chhiar thiam zawng zawng chu 98.2% an nih thu a rawn puang ta a. Hei vang hian ULLAS chuan May 20, 2025 khan Mizoram chu India rama a hmasa ber atan fully literate state-ah an rawn puan tak thu a sawi a ni.