Zangnadawmna pek thubuai kal zelah Court thupek in PWD Division Office kalh sak
Serkhan-Bagha kawng zangnadawmna pek tur ang an pek theih loh avangin PWD Kolasib Division Office chu nimin khan Kolasib Fastrack Court Judge R. Vanlalena thupek-in kalh a ni a. PWD Office lirthei (Motor) leh JCB te bakah khawl lian dang engemaw zat chu Court hian a hrensak bawk.
Mizoram PWD chuan kum 2013/2014 bawr vel khan Serkhan to Bagha Road Kawngpui laih zauh hna thawkin, mimal ram tam tak a tihchhiat sak a. Ram neituten Zangnadawmna (Compensation) an hmuh tur zat pawh sawrkar thuneitu ten an bithliah fel sak mah se chhan hrang hrang avangin Zangnadawmna hi pek fel mai theih an ni lo a. He thubuai hi Kolasib District Court-ah hun engemaw chen a inchiah hnuin nikum (2024) December thla khan Kolasib Fast Track Court chuan ram neitu ten Zangnadawmna an dawn tur te chu PWD-in thla hnih (2) chhunga pe fel turin Order a tichhuak a. Zangnadawmna tur sum hi a vaiin Rs. 3,42,25,444 a ni a, ram neitute hi mi 62 niin, Saiphai leh North Chaltlang khua mite an ni.
Court Order hi PWD lam chuan an tih hlawhtlin mai loh avangin ram neitute lungawilo chuan Kolasib District Court-ah kumin March thla khan Execution Petition an filed a, Court chuan huntiam siam sak leh mah se PWD-in zangnadawmna chu an la pek theih loh cheu avang leh thu mumal an neih theih loh avangin Kolasib Fast Track Court Judge, R. Vanlalena chuan PWD, Kolasib Division bik Office building, Tumpui Veng, Kolasib a mi kalh sakna tur Order chu a tichhuak a. Hetih rual hian PWD Office lirthei (Motor) leh JCB te bakah khawl lian dang engemaw zat chu Court hian a hrensak bawk a. Heng bakah hian a tul ang zelin Code of Civil Procedure, 1908 in thuneihna a pek angin Office Building leh JCB bakah khawl lian dangte leh Office Computer te chu auction-a (lilama) hralhsak theih a ni.
He thubuai chungchangah hian PWD Kolasib Division-a Executive Engineer (EE) Lalfakzuala chuan tuna zangnadawmna an pek theih lohte hi a hmaa compensate la tawh, an lak tawha lungawi lova claim nawn leh an nih thu a sawi thung a, Court-ah sawrkar chu a chak loh zawk avangin an Office chu kalh sak an ni ta tih sawiin, bungrua an neih ang angte pawh hren sak an nih thu a sawi bawk.