Neihloh khua sawn tura hmalakna thlirho a ni

Serchhip Bial chhunga khaw pakhat, Neihloh khua sawn tura hmalakna kal mekah nimin khan Bialtu MLA leh Chief Minister Lalduhoma hovin Neihloh khaw thar tura duan (proposed plan) chu Official te leh Neihloh khawtlang hruaituten an enho.
Neihloh khaw thuthmun hi leilung chhiatna thleng thei (Disaster) lakah a him tawh lo nia hriat a ni a, kumin Fur ruatui tla pawh hi an tuar nasa hle a. Hetiang dinhmuna an din avang hian an khaw-tlang chuan an khaw ramchhung, tuna an khaw thuthmun thlenhma deuhah hian khaw thar kai mai an duh a. Sawrkar atanga hmasawnna hnathawhna tur sum an hmuhte pawh khaw thar atan an dah deuh zel tawh nghe nghe a ni.

Bialtu MLA leh Chief Minister kaihhruaina hnuaiah khaw thar tur ruahmanna hi Town & Country Planning, UD&PA chuan Plan an siam a, hei hi nimin khan Chief Minister ho hian a Pisa-ah an thlirho a, Town & Country Planning-a Asst. Director Lalhruaitluanga Ralte chuan Neihloh khaw thar, chenna In 108 leh sawrkar hmunhma pawi-mawh engemaw zat awm theihna tur plan an siam chu a sawifiah a. A hmunhma hi a rang lama samfai nise, hmalak bul tan theih chi apiang chu tan mai nise an ti a ni.

Nimin-a thutkhawm ah hian Chief Minister hi Commissioner & Secretary to CM Vanlaldina Fanai chuan a tawiawm a, UD&PD Department Official pawimawhte leh Neihloh khawtlang hruaitute an tel bawk.