FCAA dodalna hun Aizawl-ah hman a ni

Joint Civil Society of Mizoram (JCM) huaihawtin nimin khan Aizawl-a Vanapa Hall kawt-ah Assembly Session neih zawh taka Forest Conservation (Amendment) Act 2023 hmang ve tura pawm tak duhlohna leh dodalna hun hman a ni.

He hun kaihruaitu JCM Convener Dr. Lalbiakmawia Ngente chuan Mizoram Assembly Session in FCAA 2023 a pawm tak avangin Mizoram inven theihna awmchhun pakhat, Article 371 G chu hman theih a ni tawh lo tih sawiin, sawrkar laipui hmalakna chu State sawrkar leh Mizo mipuite chuan sawi theihna leh lo dan theihna dan an nei tawh lo tih a sawi a, Environment leh ramngaw humhalh tura vantlang mipui rawnna te pawh a awm thei tawh dawn lo niin a sawi a ni.

He hunah hian Mizoram First aiawhin ZR. Thanghmingliana, Centre for Environment & Social Juctice aiawhin Joseph Hmingropuia leh Mizoram Transformation Movement aiawhin Dr. Vanlalsiama Chhangte te pawhin thu an sawi a, Mizoram Assembly Session in FCAA 2023 a adopt an duh loh zia leh Mizoram dinhmun a tihderthawn zia te sawiin, Mizo thalaite chu harh chhuak a, ram leh hnam tana auchhuak turin an chah a ni. 

JCM huaihawt FCAA 2023 duh loh lantirna hi NGO leh Political Party hrang hrangten an thlawp angin he hunah hian Party hrang hrang hruaitute pawhin thu an sawi a, mipui pungkhawm te chuan FCAA duhlohna an au rualpui bawk a ni.