Rampum-a Rashtriya Poshan Maah (National Nutrition Month) vawi 8-na hman mek pualin nimin khan Serchhip ICDS Project leh DPO Office te chuan Serchhip Sailiam atanga Thenzawl panna kawng tawngtaina hmuna hnawmhnawk chi hrang hrang thenfai hnatlang an nei a. ICDS Project leh DPO Office-a thawktute hian ‘Cleanup drive of plastic waste material at public area’ tih thupui hmanga hnatlang hi neiin hmun bawlhhlawh leh tawp lai an thianfai a. He hun hi Serchhip khawchhunga WCD Department a thawktu hrang hrangte nen hmangin mi 30 an thawkchhuak a ni. Hnawmhnawk an chhar khawm te hi LAD bawlhlawh paihna hmunah paih nghal vek an ni bawk.
October 16 thlenga neih tur Rashtriya Poshan Maah hi Serchhip ICDS Project leh DPO te hian ruahmanna siamin naupangte leh nu naupai te mai bakah tleirawl te thlenga ei leh in tha a pawimawhzia inzirtirnan te, naupang hrisel taka an thanlen theih nana inzirtirna piah lamah khawtlang tana thil tha tih nan an hmang a ni.
