North Vanlaiphai-ah SBI Branch thar hawn a ni
North Vanlaiphai-a SBI Branch thar hi North Vanlaiphai Rahsi Veng Gate Kawn-a an Pisa-ah hawn niin SBI Branch thar hawngtu Bialtu MLA chuan State Bank of India (SBI) chu India rama Banking leh Finance huangah a kila lung pawimawh ber a nih thu leh India ramah hian Bank leh Bank pangngai ni chiah lo sum/pawisa hmanga sumdawng Financial Institutions tam tak a awm thu a sawi a, chung zingah chuan sawrkâr tâ, sawrkâr in a enkawl leh thuneihna a neihna Bank, ‘Public Sector Bank’ an tih zingah SBI hi a lian ber a nih thu sawiin, Sawrkar ta leh sawrkar enkawl a nih avangin sawrkar laipui hmalakna hrang hrangah pawh a pawimawh thu a sawi a. “Central Scheme tam tak hi SBI nen inthlunzawm a ni a, helai Bial a Loneitu leh kuthnathawktute pawhin kan hman tangkai tur scheme tam tak a awm a, a bik takin kan sawrkar hmalakna pui ber Hand Holding/Bana kaih Policy hmang tangkai thei tur he Bial-ah hian mi tam tak an awm a, chung mite tan theihtawp min chhuahpui turin Bank hotute pawh hma la turin ka ngen che u a ni,” a ti bawk.
Adviser to Chief Minister chuan Bank-a sum dah zawng zawng atanga loan pekchhuah za zela chhut chu Credit Deposit Ratio (CDR) tih a nih thu pawh sawiin, “Chumi awmzia chu CDR a tam chuan Bank-in loan a pechhuak tam tihna a ni a, Vawiin-a Bank kan hawn pawh hian CDR 60% aia tam nei turin ka ngen bawk che u a ni. Chutih rualin mipui lam pawh loan rulh theih loh puk hi mahni phurrit insiamna a nih avangin mahni rulh zawh tawk erawh mipui ten hria ila a pawimawh,” a ti bawk.
SBI Branch thar hawnna hun hi Zonunsanga, Manager HR, RBO, Aizawl chuan kaihruaiin Pauthianmung Tombing, Chief Manager (DVAS), RBO Aizawl in lawmthu sawiin hun a hmang bawk.