Tuivai HP atan DPR inhlanna hun buatsaih a ni

Nimin khan P&E Minister F. Rodingliana hovin kawlphetha MW 132 siamchhuah theihna tur Tuivai Hydel Project atana Detail Project Report (DPR) siam inhlanna hun hman a ni.

Aijal Club Conference Hall-a hemi puala hun hman ah hian Tuivai Hydel Project siamna tura DPR peihfel tak chu Dept of Economics Affairs atanga sum dil tur a nih thu tarlan niin, cheng vbc. 2400 ruahman a nih thu tarlan a ni a. Tuivai HEP Project DPR hi M/s ERNST & Young te buatsaih niin anni hi Dept of Economics Affairs DEA hnuaia Consultancy Empanlled Firm an ni. He hunah hian P&E Minister F. Rodingliana chuan Tuivai tuikhuah chu thla 24 chhunga zawh hman tura ruahman a ni tih a sawi a, tuikhuah chu a puitlin hunah chuan sawrkar-in kawlphetha leina atana kumtin cheng vbc. 600 vel a hman thin chu hmasawnna hnathawhna atan a hman theih tawh dawn tih a sawi a ni. 

Ruahman dan chuan Tuivai lui hi Ngopa leh Phuaibuang inkar ah khuah tum a ni a, tuikhuah san zawng hi meter 100 ni tura chhut niin Tuivai HEP hi Stage 1 leh 2-a khuah tur a ni anga, Stage 1-ah hian Tuikhuah atanga Luitui nungcha tana chhuahtir ngai E-Flow tur a ni a, kawlphetha MW 20 (2x10MW) a tharchhuak ang. Stage 2-ah hian kawlphetha MW 112 (2x56MW) a tharchhuak thei dawn a, DPR atanga ruahman dan chuan Tuivai HEP siamna tur sum senso tur hi cheng vbc. 2400 niin sum hi la zawn tur a ni.

Nimin-a he hun hmanah hian P&E Secretary Lalrinzuali chuan inlawmna thu a sawi a, Er. C. Lalropianga leh M/s Ernst & Young atangin Technical Report ngaihthlak a ni a,P&E Department-a Engineer-in-Chief, Er. JH Malsawma chuan lawmthu a sawi bawk.