A huho-a chawlh lak tum mek

Mizoram-a CSS hnuaia hnathawktute chuan September 9 atanga 11, 2025 chhung khian Mass Casual Leave lak an tum thu an sawi.

Nimin khan Falkland-a Youth Recreation Centre-ah All Mizo-ram CSS Employees Coordination Committee (AMCECC) chu thukhawmin State sawrkar hnuaia an dinhmun siamthatna tura an hmalakna kalzel ah State sawrkar atanga thu lawmawm an neih theih loh avangin an kal zel dan tur an rel a. CSS Employees-te’n Regularisation Scheme an hman ve ngei theih nan siamrem ngai siamrem sak tura Sawrkarin ngaihtuahna a seng miah lo leh DP&AR Minister thurawn anga representation an thehluh tawh lehkha an tih bo sak leh a thlenna tur Official hnen a thleng lo chu mak an tih thu an sawi a. Regulariation of CSS Employees Scheme, 2024 a taka an hman ngei theih nan an representation thehluh hi rang taka ngaihtuah sak a tih hlawhtlin sak turin Sawkar an phut a ni.

Hei bakah hian Mizoram sawrkar hnuaia thawk, CSS Employees te’n Regularisation of CSS Employees Scheme, 2024 hnuaia Department hrang hrang proposal an hnawl zel laia CSS pawh ni lo, Health Department hnuaia thawk Health Worker mi 31 te MR Skilled-II, PE-a convert-te he dan hmanga an dahnghet chu mak an tih thu pawh sawiin, induhsakna uchuak chu an ngaithiam lo tih an sawi a. CSS hnuaia thawkte chu dan ang thlapa lak an nih thu sawiin, “Dan lo anga lak kan awm chuan dan lo ang a latute chu zawng chhuak a, action na taka lak ni rawh se,” an ti a. Heng an thilphut hrang hrangte hi tih hlawhtlin an phut thu pawh sawi nghalin, “Min tih hlawhtlin sak a nih loh chuan AMCECC General Body Meeting chuan ni 9, 10, 11 September, 2025 chhung hian Mass Casual Leave lak nise kan ti. Hemi chhunga kan duh anga Sawrkarin hma min lak sak loh chuan kan kal zel dan tur hi ngaihtuah leh a ni ang,” an ti bawk.