Transport Minister in Karnataka-ah hmalakna zir

Bengaluru khawpui-a Karnataka sawrkar Transport Department hnuaia hmalakna hrang hrangte chu niminpiah khan Transport Minister Vanlalhlana chuan a hmunah a zirchiang.

Transport Minister hian Karnataka State-a Registered Vehicle Scrapping Facility (RVSF) pahnih zinga pakhat, Devanahalli-a Mahindra MSTC Recycling Pvt Ltd (Cero) chu tlawh hmasa berin, lirthei chi hrang hrang an thiah darh dan te a en a. Certificate of Deposit (CoD), Certificate of Vehicle Scrapping (CVS), lirthei neituin a thar a lei leh dawna rebate a claim dan te leh motor part an lilam dante kimchang takin an lo hrilh a. Hemi hnu hian Nelamangala-a Ministry of Road Transport and Higwhays (MoRTH) hmalaknaa din hmasak ber Inspection and Certification Centre chu tlawh lehin he Automated Testing Station (ATS)-ah hian lirtheite khawl hmanga test chi hrang hrang kapui dante en a. He test chi hrang hrang paltlang thei lo te chu hun pek belh thin an ni a, huntiam chhunga an siamtha thei lo emaw, a test-na fee an chawi theih loh emaw chuan Fitness Certificate (FC) pek an nih loh bakah an lirthei hren sak thin a ni.

Hei bakah hian Jnana Bharathi RTO hnuaia Automated Driving Test Centre pawh tlawhin, Driving license dil te tan 2 Wheel leh 4 Wheel driving track buatsaih niin, test hi khawl hmanga endik a nih bakah result hi khawl hmanga pekchhuah thin a ni a. Heng hmun a tlawh zawh hnu hian Karnataka Transport Minister Dr. Ramalinga Reddy nen inkawmin Vanlalhlana chuan Transport Department-in an lo dawnsawn danah a lawmthu a hrilh a ni. Mizoram Transport Minister in a tlawh tak hmun hrang hrang te hi Ministry of Road Transport and Highways (MoRTH) ruahmanna anga State tina siam tura tih a ni a. Hengte nei ve tur hian Mizoram sawrkar chuan a tul angin hma a la chho mek a ni. Heng hmun a tlawhna ah hian Transport Minister hi Transport Director Er. R. Lalrammawia leh Under Secretary Vanlalmuana ten an tawiawm a ni.