'Bana Kaih Scheme Phase II' tlangzarh a ni leh ta

Mizoram Sawrkar Flagship Program 'Bana Kaih Scheme Phase II' chu kalpui tan turin nimin khan tlangzarh a ni leh ta.

'Bana Kaih Scheme Phase II' tlangzarhna hun hi nimin khan Aizawl-a Irrigation & Water Resources Department Auditorium-ah neih niin Adviser to Chief Minister leh Mizoram State Policy Coordination Committee-a Vice Chairman Dr. KC. Lalmalsawmzauva chuan Mizoram Sawrkar Flagship Program 'Bana Kaih Scheme Phase-II' hnuaiah hian khawpuia cheng, thiamna leh theihna neisa, bultan tumte leh hmalak tawhna tihchangtlun tumte kaihchhuahna tur Loan Component-a awm bakah, kuthnathawktute kaih-chhuahna tur 'Market Handholding Support' a awm bawk avangin mi taima leh tumruhte tan ram tih hmasawnna tura hmanraw tangkai tak a nih thu a sawi a. Bana Kaih Scheme hnuaia Loan Component leh Chief Minister's Special Package-te hi a thlawna sem a nih loh thu sawiin, hnathawk tura inpeih te, theihna leh thiamna nei te, ram tih hmasawnna tura Sawrkar thawhpui tlaka ngaih te hnena tanpuina a nih thu a sawi bawk.

He hunah hian Planning & Programme Implementation Department Secretary Lalmalsawma Pachuau chuan Bana Kaih Scheme Phase-I kalpui chhung khan Loan Component dilna 11,439 dawn atangin 702 chu loan dawng tura pawm a nih tawh thu a sawi a. Heng loan pek tura pawm tawh zawng zawng belhkhawm hi cheng vbc. 76.35 niin chawhrualin mi phakhat hnenah loan hi Rs. 10,87,000 ang zela pekchhuah tur a nih thu leh an dilna Bank azirin tunah hian loan hi semchhuah mek a ni tih a sawi a, PMEGP portal siamthat avangin loan pek chhuah hi a khawtlai phah thu a sawi bawk.

Phase-I ah khan Chief Minister's Special Package diltu mi 29,571 te dilna chu a changtu Department-a thawktuten uluk taka an endik hnuah mi 2,258 te hnenah pek a ni a. Sum pekchhuah hi cheng vbc. 18.33 a ni a. Bana Kaih Scheme Phase-II ah hian Implementing Department 19 an awm tawh dawn a, dilna felfai taka thehluh a nih theih nan DPR Software siam a ni tawh a. Mi tam zawkin tangkai taka Bana Kaih Scheme hi an hmalakna tih changtlun nan leh tihhmasawnna atana an hman theih nan Chief Minister's Special Package hi Rs. 50,000 thleng pek theih tura thlak danglam a ni bawk.

Bana Kaih Scheme Phase-II tlangzarhna hun ah hian Horticulture Department hnuaia Progress Partner thlanchhuah mi 8 te hnenah Market Handholding Support kaltlangin Sawhthing her sawmna khawl hlan a ni a. Phase II kalpui chhunga dilna thehluhna tur Online Portal zirchianna hun hman niin Progress Partner dilna endiktu tur 'Search Team' te mawhphurhna hrang hrang inhrilhhriatna hun hman a ni bawk.