Traffic Police Hindi zirtir dawn

Mizoram Hindi Prachar Sabha (Mizoram Hindi Board) chuan Aizawl Traffic Police mi 24 te chu a thlawnin Hindi tawng an zirtir dawn. Mizoram Hindi Prachar Sabha Chairman RB. Lalmalsawma sawi danin Traffic Police te hi tawng (spoken) chauh zirtir an ni dawn a. Zirtir an nih chhan hi Traffic Police chu Mizo hmel lanna khawpui enkawltu an nih vang te, hnamdang lokalte thil an hrilhfiah theihna atan leh kawng an kawhhmuh theihna atan a ni a, midang pawh zirtir zel an tum tih an sawi a ni. Traffic Police te hi September 2025 atangin Hindi tawng zirtir tan tum an ni a, hemi atana inremna pawh Zirtawpni kalta khan Traffic Office-ah tihfel a ni.