Taxation Officer-te tan GST chungchang an zirho

September Ni 22, 2025 atanga India ram puma GST rate tihdanglam leh a kaihhnawiha hriat tur pawimawh te inzirtirna atan nimin khan Mizoram puma Taxation Officer-te tan Refresher Workshop on GST neih a ni.

Commissionerate of State Tax buatsaih he Workshop hi Hybrid mode-a kalpui niin, Aizawl a awm Tax Official-te chu a hmunah kalin District dang zawng chuan Online Mode in an zawm thung a. Commissioner of State Tax HK. Lalhawngliana chuan GST Council chuan September ni 3, 2025 khan bungrua leh tha (service) hrang hranga hralhna a GST rate thar hmanna tur a rel thu sawiin, “GST rate thar hmanga India ramin Tax reform a kalpui tur hi September ni 22, 2025 atanga hman tan tur niin GST rate hlawm li lai awm thin chu hlawm lian hnih (two slabs)-ah kalpui a ni tawh ang a, bungrua leh tha (service) hralhnaa GST rate chu 5% leh 18% a ni tlangpui tawh ang. Vaihlo leh a kaih-hnawih thil ah 28% GST lak a ni ang a, Lirthei thenkhatah 40% a ni tawh bawk ang,” a ti.

GST rate tihdanglam tur hi a tlangpuiin a hniam zawnga a kal dawn avangin thil man hniam phah tur tam tak a awm dawn tih pawh Commissioner of State Tax chuan sawiin, “Sawrkar in GST rate a tihhniam hian a tum lian tak pakhat chu mipui nawlpui banphak leh man tlawm zawka lei theih tura thilman siam that a ni a. GST hniamna tur bungrua leh tha zawrhna lama sumdawngte chuan a zawrhna man an tihniam ngei tur a ni a, hemi kawngah hian Sawrkar chu a thikthu a chhe hle dawn a ni. September ni 22 hnu lamah chuan GST rate tihhniamna bungrua leh tha (service) zuar te zingah a man tihniam lo report lut a awm chuan Anti Profiteering Measure hmanga action lak zel tur a ni ang” a ti bawk.

He hunah hian mithiam hrang hrang ten GST chungchanga hriat tur pawimawh te an zirtir a ni.