MCS Combined Competitive Exam-a tling thar te UPSC Exam la hmachhawn turin CM in a fuih

Chief Minister Lalduhoma chuan Mizoram Civil Services Combined Competitive Exam-a tling thar te chu UPSC lam pawh la exam zel thei se a duh thu a sawi.

Mizoram Civil Services Combined Competitive Exam-a tling, Administrative Training Institute-a Combined Foundation Course kal mek MCS, MFAS leh MIS Officers te hian niminpiah khan Chief Minister Lalduhoma hi CM Conference Hall-ah kawmin Chief Minister chuan officer tharte hi lawmpuina hlanin an kal zelna turah duhsakna a hlan a. “In hna hi Pathianin in rawngbawlna tura a pek che u a ni a. Phur tak leh rinawm takin in thawk dawn nia,” tiin Service hrang hrang ten a huhova training an nei chu lawmawm a tih thu a sawi a, “Hei hian in zingah innelna leh inhriatthiamna thuk tak a siam dawn a. Ram in a hlawkpui dawn a ni,” a ti a. “Reilote chhungin Mizoram-ah service rivalry a nasa lutuk tih ka hmu a, he inelna tha lo hi tihbo kan duh a, nangni hi chuan rawn chhawmlut ve suh u,” a ti a. “Tunah hian in rilru chak vanglaite a la nih avangin UPSC lam pawh la exam zel thei ula a thain ka hria. Central Service lama kan tling hlei thei lo hi rualawh a nain kan mamawh em em a ni,” a ti bawk.

Mizoram Civil Service Combined Competitive Exam-a tling thar, Administrative Training Institute (ATI)-a Combined Foundation Course kal mek te hian nimin khan Saitual tlawhin Bawrhsap, Dr. Lalngura Tlau hovin a Pisa-ah an inkawm a, he hunah hian Saitual Bawrhsap chuan Mizoram mipuiten beiseina nen sawrkar an thlir thin tih sawiin, an beiseina te tipuitling thei tur chuan sawrkar hnathawkte an pawimawh em em a ni tih a sawi a, Mizoram hmasawn nana theihtawp chhuah turin Officer te chu a chah a ni. Bawrhsap chuan DC inrelbawlna tha tur chuan Department hrang hrang te nena thawhhona tha (convergence) neih a pawimawh tih a sawi bawk a, Department te zawk te dawmkang a, kaihhruai a tul chang te a awm thin tih sawiin, tanrual chuan sang tak a thlen theih tih a sawi bawk.

ATI-a MCS Combined Foundation Course kal mek te hi MCS 17, MF&AS 14 leh MIS 3 an ni a, Saitual an tlawhna ah hian ATI Director Rita Lalnunmawii; Course Director leh ATI-a Joint Director (Admin), Lalhmansanga Khiangte leh Core Faculty Lalnunmawii Varte ten an ho a ni.