Swasth Nari, Sashakt Parivar Abhiyan leh 8th Rastriya Poshan Maah Campaign hawnna lo zawm

India rampuma Swasth Nari, Sashakt Parivar Abhiyan leh 8th Rastriya Poshan Maah Campaign kalpui tur chu nimin khan Prime Minister Narendra Modi chuan Madhya Pradesh-a Dhar atangin a hawng a, he hun hi Mizoram atang pawhin Mizoram Legislative Assembly Annexe Conference Hall-ah Governor General (Dr) Vijay Kumar Singh hovin lo zawm ve a ni.

Mizoram-a hemi puala hun hman ah hian Larsap chuan kum 2018-19 atanga Mizorama Ayushman Bharat kalpui a nih hnuah hriselna lama hmasawnna tam tak hmuh a nih thu leh, inenkawlna tha leh tlawm, hnaivai bawk si hmanga bultan a nih thu sawiin, Medical College, District Hospital, PHC, CHC, UPHC, Health & Welness Centre leh Sub-Centre-te kaltlangin health facility-te hnuh hnai a nih thu leh mipui tan awlsamna siam a nih thu a sawi a. Mipui hmakhua ngaia Jan Aushadhi Scheme hnuaia damdawi man tlawm pekchhuah a ni chu lawmawm a tih thu a sawi a. Nu leh naupangte hriselna kawnga hmalakna leh chaw tha ei pawimawh zia inzirtirna 8th Rastriya Poshan Maah Campaign kalpui tur chuan rah tha a chhuah ngei a beisei thu a sawi bawk.

Larsap chuan India rama Infant Mortality Rate hniam ber (13 per 1000 live births) zinga Mizoram a tel chu lawmawm tiin, hei hian naupang leh nau piang hlimte enkawl kawnga Mizoram hmasawn zia a tarlan thu a sawi a. Kumtin Doctor 100 dawn leh Nurse engemaw zatin Mizoram health care system an zawm belh thu sawiin, hriselna kawnga Mizoram tha tichaktu pawimawh tak an ni, a ti a. HIV/AIDS, drug ngawlveina leh malaria-te chu ngaihven tul zual a la nih mek zel thu leh, vaihlo leh a kaihhnawih dangte kan tih nasat avanga Cancer leh Chuap natna vei Mizoramin a ngah chu veiawm a tih thu a sawi a, hneh thei tur chuan khua leh tui zawng zawngte kan zavaia tanrual a tul a ni, a ti bawk.

Swasth Nari, Sashakt Parivar campaign-in a tum ber chu chhungkaw nu ber atanga tana hriselna bultan a ni a. Hemi hnuaiah hian September ni 17 atanga October ni 2, 2025 chhung hian hmeichhiate hriselna lam hawi Campaign kalpui tur niin, Hospital hrang hrang, Health & Welness Centre leh Health Sub-Centre-ah te Cealth Camp leh check-up neih a ni dawn a. PMJAY, PMMVY leh Nikshay Mitra enrollment kalpui a nih dawn bakah Ayushman Bharat Health Account (ABHA) ID siam a ni dawn bawk a. Naupang vaccine pek, BP sang, Zunthlum, Hnute Cancer, Anaemia leh TB vei zawnchhuah bakah AYUSH Awareness, Oral Health leh Blood DoCation camp-te buatsaih a ni dawn bawk a. 8th Rastriya Poshan Maah kaltlangin nu leh naupangte hriselna nan hmalakna hrang hrang kalpui a ni bawk ang.