North East CSR Connect 2025-ah Mizoram atangin Minister leh sawrkar mi pawimawh an tel

Nimin khan New Delhi-ah ‘North East CSR Connect 2025’ neih niin he hunah hian Mizoram atangin Minister of State Lalnghinglova Hmar chu a tel a ni.

Confederation of Indian Industries (CII) buatsaih ‘North East CSR Connect 2025’ hi New Delhi-a Lalit Hotel-ah neih niin Minister Lalnghinglova Hmar hi khual zahawm a ni a, Mizoram chu State lian lo leh mihring tlemna, CSR pawh dawng tam lo tak State a nih thu sawiin, “Chutihlaiin Mizoram hi CSR Fund hmanna tur tak State kan ni a, mipui kan tlem avangin Investment pawh a langsar hma a, awmzia a nei bik thin,” a ti a, kalkhawmte chu CSR hmanga hmasawnna ngelnghet thlen tura Mizoram leh Northeast lam hawi turin a sawm a. Mizoram in CSR Cell felfai tak a neih thu leh, Chief Minister Office atanga vil a nih thu sawiin, Mizorama CSR invest duhte’n awlsam, langtlang leh awmze nei zawka an kalpui theihna’n ‘Mizoram CSR Connect’ chu hman theih tura peihfel tep a ni tawh tih a tarlang bawk a. Mizoram leh Northeast India-a CII hmalakna hrang hrangte tarlangin, Mizoram-ah ngei CSR Conclave buatsaih turin CII hotute a sawm nghal a ni.

North East CSR Connect-ah hian DoNER Minister Jyotiraditya Scindia chuan Video message kaltlangin thu a sawi a, CII buatsaih ‘CSR Investment in Northeast India: Understanding Barriers and Way Forward’ tih chu tlangzarh nghal a ni bawk a. Hemi hnu hian mithiam thlan bikte’n ‘Corporate Best Practices: Driving Scalable CSR in the Northeast’ leh ‘NGO Capacity Building: Compliance, Accessing CSR Funding & Strengthening Partnerships’ tih thupui hmanga thu sawiin, Northeast State hrang hrang aiawhte’n an State theuha CSR invest na tur priority area an neih te presentation hmanga tarlangin, Mizoram aiawhin Mizoram State Sports Council-a Secretary Henry C. Lalrawnkima chuan Mizoram tan a present ve bawk a ni.

Confederation of Indian Industries-ah hian direct member Company 9,700 vel awmin, indirect member 365,000 vel an awm mek a. CSR Connect hi Northeast-a CSR tam zawk invest a nih theihna’n buatsaih niin, kumin hi a vawihnihna a ni a. Nikum July 3-4 khan New Delhi-ah tho a vawikhatna’n neih a lo ni tawh a ni.

Kumin-a CSR Connect-ah hian Mizoram atangin Minister bakah hian Mizoram Youth Commission (MYC) Chairman Malsawmzuala Ralte leh LESDE Department Director John Tanpuia bakah CSR Cell Mizoram leh MYC atangin Official an tel a. Mizoram-a NGO - Mission Foundation Movement (MFM), Goodwill Foundation leh Zo Inspiration aiawhte pawh an tel bawk a ni.