Serchhip District chhung hmun hrang hrangah CSS-a thawktu ten Sit-in demonstration an nei
All Mizoram Centrally Sponsored Scheme Employees Co-ordination Committee (AMCECC) huaihawtin CSS hnuaia thawktute hian nimin khan Mizoram hmun hrang hrangah sawrkar laka an thiphut lantirin Sit-in demonstration hi an nei a, Serchhip District-a hemi puala hun hman lian ber Serchhip Indootr Stadium kawt-a neih chu AMCECC Sub-Hqrs. Serchhip President H. Lalramsanga chuan kaihruaiin he hun an hman chhan tlangpui a sawi a. Hemi hnu hian an pawl Secretary Zairemthanga chuan sawrkar laka an thilphut hrang hrang an lo nawr tawh dan leh tuna harsatna an neih mek te a sawi a, hemi hnu hian he huna tel te hian tawngtai rualna hun an hmang zui bawk a ni.
AMCECC hruaitute chuan an hnathawhna hmuna dahngheh chu an nawr ber leh an thilphut ber a nih thu sawiin, April 15 -17, 2025 chhunga Pen down strike neih tuma sawrkarin representation thehlut tura a ngen anga DP&AR Minister hnena May 19 2025-a an thehluh chu a thlenna tur Official hnen thleng lovin kawng lakah tihbo a ni tih an sawi a, “Hei hian sawrkarin min ngaihsak loh zia leh engahmah min ngailo a ni tih a lantir,” an ti a Regularisation of CSS Employee Scheme, 2024 chhuah hnu lawkah anmahni dan chepna tura ruahman Office Memorandum khirh khan tak DP&AR in a rawn tichhuak nia sawiin, hei hi sut leh turin vawi tam tak an ngen tawh thu leh tun thlenga sut ala ni lo chu mak an tih thu leh CSS Employee-te hmuhsitna lian tak a nih thu an sawi a. Sawrkarin Regularisation of CSS Employee Scheme, 2024 a siamsak avanga an lawm em em laiin a Scheme neitu lo zawk, Health Worker MR/PE te Regularisation of CSS Employee Scheme, 2024 hmanga mi 31 dah ngheh an ni chu hriatthiam harsa an tih thu leh a Scheme neitu zawk an hmantir duh loh laia Scheme neitu ni lo MR/PE zawkte awlsam taka an hman tir mai chu hriatthiam harsa an tih thu an sawi bakah Sawrkarin Scheme Implement a nih hunlai mil ang zel leh Framework anga qualify ngeite an thawh laia Chief Minister-in Independence Day lawmna ah leh Govt. Aizawl College Function-ah CSS Employee-te chu dan loa lak anga a sawi chu hriatthiam harsa an tih thu an sawi a. “Dan lo-a lak an lo awm a nih chuan dan loa latu chu chhuichhuah kan phut tlat a ni,” an ti bawk.
Nimin-a Serchhip-a CSS hnuaia thawktute punkhawmna hunah hian mi 350 vel telin heng te hi Serchhip bakah Thenzawl, Keitum, Bungtlang leh Chhingchhip khua te an ni tlangpui a, nimin-a he hun hman a nih rual hian Serchhip District chhunga khaw danga pawh CSS hnuaia thawktute hian Sit-in demonstration hi an nei a. Lungpho, Ngentiang leh Rullam khuaa thawktute chu Ruallam-ah kalkhawmin East Lungdar leh Leng khuaa mi te chu East Lungdar-ah an kalkhawm bawk a. Heng bakah hian Khawbel. Thinglian, Khaw-lailung, Sialhau leh North Vanlaiphai khua ah te pawh CSS hnuaia thawktute hi an kalkhawm bawk.
CSS hnuaia thawktute lungawi loh lantirna hi nimin khan Mizoram hmun hrang hrangah pawh neih a ni a, AMCECC hruaitute chuan Regularization of Centrally Sponsore Scheme (CSS) Employees Scheme, 2024 chu CSS Employees-ten an la hman theih lohna chhan chingfel turin sawrkar lamin hmalakna engmah an la neih loh thu sawiin, sawrkar hotute nen pawh mumal taka sawihona an neih loh thu an sawi bawk.
AMCEC te hian sawrkar laka an thil-phut nawrna atan hian September ni 9 atanga ni 11 chhung khan Mass Casual Leave an lo la tawh a, an kal zel dan tur ngaihtuah an tum thu an lo sawi tawh bawk a ni.