Serchhip District-ah Intensified IEC Campaign thawh hnihna kalpui turin hawn a ni
Mizoram State AIDS Control Society (MASCS) leh District AIDS Control Committee huaihawta kum hmasa lama ‘Intensified IEC Campaign’ hi neih a nih hnuah kumin hian ‘2nd Phase of Intensified IEC Campaign’ chu neih leh a ni dawn a, he beihpui thlakna hi nimin khan Serchhip Sub-Hqrs. YMA Hall-ah a hawnna hun hman niin khuallian nia he hun hmanpuitu Bawrhsap Paul L. Khuma chuan HIV/AIDS hi kum 1981-a Los Angeles, USA-a an hmuhchhuah atangin Vawiin thlengin khawvelin a la buaipui a, Mizoram leh Serchhip District ngeiah pawh tun thlengin min la chenchilh a, tuna a vei mekte bak mi tumahin an kai thar tawh lohna turin kan zavaia theihtawp kan chhuah a ngai tih a sawi a, he huna kalkhawmte chu HIV/AIDS kai theih dan leh a darh zel dante hrechiang turin a chah bawk. Bawrhsap chuan kum 2030-ah chuan HIV hi khawvel tibuaitu, Public Health Crisis a nih tawh lohna turin inzirtirna beihpui, Intensive IEC Campaign hi kalpui a nih thu sawiin, hemi kawngah hian sawrkar, khawtlang hruaitu, tlawmngai pawl leh mipui mimir thawhhona a pawimawhzia a sawi a. IEC Campaign atanga HIV/AIDS nihphung kan zirchhuahte hi mahni In lamah hawnin, chhungkaw ti ti ah te neih thin turin kalkhawmte a fuih a. He natna tihbaiawm tak hi a darh zel lohna tura tanlak a tulzia te, a vei mekte pawh endawng leh thinhrik mai loa khawngaihna leh lainatna kan lantir zawk a tulzia te a sawi bawk.
Nimin-a he Campaign hawnna hunah hian MSACS atangin Lalhmingliani Pachuau, Assistant Director chuan inlawmna thu sawiin, he hmalakna kalpui a nih chhan te a tarlang a. ICTC Counsellor Lalnuntluangi Renthlei leh DSRC Counsellor F. Lalrindiki ten thupui thlanbik hmangin kalkhawmte zirtirna an pe bawk a, Intensified IEC Campaign hi kumin October thla thlenga neih tur niin hemi chhung hian khaw 27-ah HIV/AIDS chungchang inzirtirna leh thisen test runpui neih a ni ang.
Serchhip District-ah hian tun dinhmunah mihring awmzat atanga tehin HIV hrik pai mek (nu naupai chhiar tel loin) za zelah 2.2 an awm a. District dangte nena khaikhinin HIV hrik pai tam lamah Serchhip District hi Mizoram-ah panga (5)-na a ni. HIV hrik kai zingah hian Drugs-a inchiu thin (Injecting Drug Users) zingah a hluar ber a. Mipat-hmeichhiat hmansualna atanga kai ten an dawt a ni.