Serchhip-ah Swachhta Hi Seva hawnna neih a ni
Swachhta Hi Seva hawnna hunah hian Bawrhsap Paul L. Khuma chuan Serchhip District hian faina lamah hma kan hruai tih sawiin, Mizoram Cleanliness Competition-ah pawh tum hnih lai pakhatna dinhmun kan lo luah tawh thu leh District khawpui fai ber kan nih leh ngei theihna turin mipuite kan tanrual a tul thu a sawi a. Serchhip Sub-Hqrs. YMA President Kawlthuama pawhin faina kawnga tanlak a tulzia sawiin, Serchhip khaw mipuite leh chhungkaw tinte faina ngai pawimawh turin a sawm a ni.
Serchhip-a Swachhta Hi Seva hawnna inkhawm hi PHE Serchhip WATSAN Division-a Sr. EE Isaac Lalchhuanmawia chuan kaihruaiin Serchhip Joint VC Chairman R. Sanghmingthanga chuan lawmthu sawiin hun a hmang a. Hemi hnu hian Faina hnatlangpui neih chhunzawm nghalin Serchhip Bazar, Tuikhuah Veng leh Hospital panna kawngpuite tihfai hnatlang neih a ni.
October 2, 2025 thleng awh tur Swachhta Hi Seva hman dan tur niminpiah khan Serchhip DC Paul L Khuma hovin Serchhip DC Meeting Hall-ah rel a ni a. Ruahman ang chuan September ni 25 hian School, College, Institution hrang hrang te, Hospital te, Office te leh vantlang hmun pawimawh tihfai hnatlang neih a ni anga. Village Council zawng zawngah faina hnatlangpui neih a ni ang. Hei bakah hian naktuk, September 19-ah Sanitation Worker te tan Serchhip Hospital-ah Free Health Camp buatsaih a ni dawn bawk a ni.
Serchhip District chhung khaw tinah Swachhta Hi Seva hi kalpui a ni anga. Hmun bal zual lai bik - Black Spot tihfai a ni anga. Thenzawl leh North Vanlaiphai Civil Sub Division-ah te SDO (C) te kaihhruaina hnuaiah Swachhta Hi Seva hi hman a ni dawn bawk a ni.