Adi Karmayogi Abhiyan hnuaiah Serchhip District-ah hmalakna kalpui mek a ni

Sawrkar laipui-a Ministry of Tribal Affairs hmalakna kal mek pakhat 'Adi Karmayogi Abhiyan' hnuaiah nimin khan Serchhip-ah District Process Lab hawnna neih a ni a, Aadi Karmayogi Abhiyaan hi Tribal Area bikah chak taka sawkar inrelbawlna kalpui a nih theih nana sawrkar mi leh sa nuai 20 chuang hruaitu tha ni thei tura chherchhuahna tur a ni.

Serchhip BDO Conference Hall-a 'Adi Karmayogi Abhiyan’ hnuaia District Process Lab hawnna hunah hian Serchhip Addl. DC Lalrinzuala chu khualian niin kum 2030-ah chuan India rama thingtlang khua leh Tribal mipuiten hmasawnna hmel thar an hmuh theihna turin Sawrkar laipui chuan ‘Vision 2030’ a duang a, chumi hlawhtlin nan he Scheme 'Adi Karmayogi Abhiyan' pawh hi kalpui a nih thu a sawi a. Sawrkar Laipui chuan he Scheme hi a ngai pawimawh hle a, PM Office atanga uluk taka vil (Monitor) reng a nih dawn thu a sawi bawk. Serchhip Addl DC chuan Sawrkar hnathawkte chu mahni hamthatna tur dahtha a, mipuite tana thawktu tur an nih thu leh thupetu chauh nilo a mipuite kaihruaitu tur, Tribal Grassroot Leader tha chherchhuak turin a chah a. Block Level Master Trainer te chu Block leh Village a thawktu tak tak tur te an nih dawn avangin taima leh uluk taka training turin a fuih bawk a ni.

Nimin-a he hun hman hi Adi Karmayogi Abhiyan Nodal Officer Dr. Marylin Lalruatkimi SDC chuan kaihruaiin he hunah hian ‘Block Level Master Trainer Training’ neih a ni a, District Master Trainer Stephen Laltlansanga Auhmun chuan Adi Karmayogi Abhigyan awmzia leh a tum te a sawifiah a. District Master Trainer C. Laldinpuii chuan lawmthu sawiin he Training hawnna programme hi a khar a ni.

District Process Lab-a tel te hi Serchhip leh East Lungdar RD Block-a Line Department atangin mi 6 ve ve, an vaiin mi 12 an ni a. Riaklut in ni 3 chhung an training dawn a ni. Ministry of Tribal Affairs chuan a bulthuma sawrkarna tih chakna turin Aadi Karmayogi Abhiyaan hnuaiah chak takin hma a la mek a, he Abhiyaan-in a tum ber chu Tribal Area bikah chak taka sawkar inrel-bawlna kalpui a nih theih nana sawrkar mi leh sa nuai 20 chuang hruaitu tha ni thei tura chherchhuah a ni.

Ministry of Tribal Affairs hian Tribal Area hi ngai pawimawhin hriselna kaihhnawih (health care), zirna (education), hmasawnna ruhrel (infrastructure) leh Sector hrang hrangte a Scheme tam tak awmsa ah Tribal Area tana hamthatna awm angte tam thei ang bera dawn a nih theih nan uluk lehzuala chak taka sawkar inrelbawina kalpui a nih theih nan a sawrkar mi leh sa te leh a thawhpuite training hmanga infuihtharna leh mipuite tana chhen-fakawm ni tura inchherchhuahna chu a tum lian ber a ni.

Aadi Karmayogi Abhiyan hi Mission ni mai lovin sawrkar tha nei tura mipuite tel vena tur beihpui thlakna (movement) a ni a. Tun hmaa a chung lam atang ruahmanna kalpui (Top-down approach) ni tawh lovin a hnuailam atang ruahmanna kalpui (bottom-up approach) siam tura beihpui thlakna a ni a. Khawtin in anmahni khaw hmasawnna tur an duan thiam theihna tura zirtir te, chumi ti hlawhtling tura sawrkar scheme hrang hrang thawhho tir te a tum a ni.

Hemi atan hian Serchhip District-ah pawh hmalakna tam tak lo awm tawhin, District Nodal Officer, District Level Master Trainer, Block Nodal Officer-te pawh ruat tawh niin anni hian State Process Lab-ah training paltlangin, training paltlang tawhte hian District Process Lab-ah leh Block Level Process Lab-ah Field Level Staff thlenga training pek beihpui thlak tum a ni. Heng bakah hian District Responsive Governance Group leh War Room-te pawh siam tum niin, mipui lungawi lohna chinfelna tur Seva Centre leh Village Action Plan siam te pawh a huam tel dawn a ni.