CSS tan sawrkar in hma a la mek zel tih sawi
.jfif)
CSS hnuaia thawktu ten nimin atanga tiamchin awm lova nawrh an huaihawt chungchanga thuthar thehdarhtu thenkhat ten an kawmna ah DP&AR Secretary chuan All Mizoram CSS Employee Coordination Committee (AMCECC) ten an thilphut sawrkar-a an thlen chungchang ah indawrna ala awm chiah lo a, AMCECC in an duh leh an phut sawrkar-a an thlen chu tunah hian zirchian mek a ni a, zirchianna hi zawhfel a nih phawt loh chuan indawr theih pawh a ni chiah lo tih sawiin, CSS hnathawk te thilphut chu tih theih awm leh awm loh a lang sa deuh ruak a. Hetihrual hian an inrawnkhawm phawt loh chuan thutawp siam theih a ni lo a, an ngheh theihna turin sawrkar chuan hma a la reng tih a sawi a ni.
DP&AR Secretary chuan The Govt. Regularisation of CSS Employee Scheme, 2024 hmangin CSS hnuaia dahngheh theih zingah dahngheh an lo awm tawh thu sawiin, Irrigation & Water Resource-ah mi pakhat leh Health Worker mi 31 dahngheh an nih tawh thu a sawi a. He Scheme in a sawi Dan te zawm kim tan chuan ngheh theihna kawng a inhawng reng tih sawiin, AMCECC in an lungawi lohna an sawi zinga mi ‘Checklist’ chungchang pawh a sawifiah a, Checklist chu rawih an nihna Scheme atanga paih zawk a nih thu leh State sawrkar in a duh duha an phuah a nih loh thu leh Scheme in a sawi angin dik taka lak an ni em tih leh sawrkar-a nghet turin Dan an zawm kim em tih endikna tur a ni zawk tih a sawi a. Scheme in a sawi ang chuan CSS hnuaia thawk te chu Proper Recruitment process-a lak te tan chauh ngheh theih a ni a, Dan dik taka lak an ni em tih endik nan Open Advertisement chhuah a ni em tih te, Hna diltu zingah a tha leh tling ngei lak an ni em tih tihchian nan Departmental Promotion Committee (DPC) tehna result a awm a ngai a, heng te hi Checklist-ah telh a nih thu leh an zinga thenkhat chu kum 20 vel kal tawha lak an nih avangin Advertisement copy chu tihbo palh awm thei a nih avangin a chinfel dan tur ngaihtuah mek a nih thu a sawi bawk.
SSA-a thawkte'n Court-ah Mizoram Sawrkar an khin vangin Regularisation of CSS Employee Scheme, 2024 a pian thu sawiin, “Gauhati High Court, Aizawl Bench khan SSA-a thawkte hi dahnghet turin a ti ngawt lo. Duhthlan tur pathum - an ngheh theih dan tur ngaihtuah, post create-a SSA puala Cadre siam leh Regularisation Scheme ngaihtuah sak a ni. Khatihlaia sawrkar MNF khan Regularisation Scheme ngaihtuah sak turin thutlukna a siam a, duan chhoh nimah se, inthlan a nih chhoh avangin hman hman a ni lo. ZPM Sawrkarin tihdanglam nei chuang loin Cabinet-ah an pawm,” a ti bawk.