Serchhip-ah ILP enfiah runpui neih a ni
August 6, 2025-a Serchhip District Bawrhsap Paul L. Khuma hova Police hotute, YMA leh VC bakah sawrkar mi pawimawh te thukhawmin thla tin ILP enfiah runpui neih thin an rel ang leh a hmasa ber atan August thla chhunga neih an rel angin Zirtawpni zan khan Serchhip Town chhunga Veng hrang hrangah hnamdang awm mek te chu Line Permit (ILP) an neih dan enfiah a ni a, he hunah hian Serchhip Police te leh YMA Branch hrang hrangte thawkchhuakin mi 139 te ILP enfiah sak niin heng zingah hian ILP felfai lo nia hriat mi 26 te chu Police te hnenah hlan an ni.
Heng mi 26 te hi Serchhip Police te chuan buaipui zui nghalin an zinga ILP nei lo leh thi tawh mi 18 te chu Inrinni khan Serchhip District Court ah hruai an ni a, heng mi te hi Inrinni vek khan Serchhip District Jail-ah dah an ni. Thudawn danin tun tuma ILP fel lo nia hriat an man tam ber te hi Serchhip District Jail sakthat hna thawktute an ni a, midang thenkhat hi ILP dilna thehlut tawh leh la chhuak mai lo te an ni.