Scholarship leh FCAA chungchang CM zawtfiah

Aizawl City College Joint Students’ Union hruaitute chuan nimin khan Chief Minister Lalduhoma chu a Pisa-ah hmuin Zirlaite Scholarship la sem theihloh chungchangah leh Forest Conservation Amendment Act dodalna awm chungchang an zawtfiah a. Chief Minister chuan Scholarship chu sem anih thuai theih nan hma an lak mek thu sawiin, SNA SPARSH vanga Budget sanction theihloh pawh Central lamin ‘One Time Exemption’ an pek phal tawh thu a sawi a ni.

FCAA chungchangah Article 371G rahbehna anga sawi a awm chu thudik lo anih thu Chief Minister chuan sawiin, Article 371G hi a duangtu zingah a tel avangin a hriatchian thu leh Sawrkarin an ngaihtuah ber chu mihring hmasawnna a nih thu a sawi a. Ramngaw leh ramsa te nei teuh mah ila, ram mipuite himna a derthawn a, kan dinhmun a that si loh chuan awmzia a awm lo tih a sawi a. ZPM chu Mizo mipuite hmangaih tak taktu an nih avangin Mizoram tana thalo chu engmah an tih ringlo tura Mizoram mipuite a duh thu a sawi bawk.