Mizoram-a ruhro hmuhchhuah zirchianna tlangzarh

Kumin January thlaa Vanbawng leh North Khawlek khaw inkar Thingkhuang Ngaw Pûk chhunga ruhro hmuhchhuahte chu Carbon 14 Dating hmangin kum AD 1260 - 1320 inkara mite an ni tih chhût chhuah a ni.

Indian National Trust for Art and Cultural Heritage-INTACH, Mizoram Chapter hruaitute chuan nimin khan Aizawl Press Club-ah thuthar theh-darhtute kawmin an Convener Rin Sanga, IAS (Retd) chuan tunhnai khan Mizoram hmarlam Khawlek khuaa Puk hmuhchhuah atangin mihing ruhro, kum 700 chuanga upa tawh hmuhchhuah a ni tih a sawi a. Ruhro hmuhchhuahna, Vanbawng leh Khawlek inkar Saitual District kham ko-a Thingkhuang ngaw Pûk hi Laltlanhlua, Khawlek-in January ni 11, 2025-a a hmuhchhuah a ni tih sawiin, N. Khawlek khawtlang hotute’n an ngen angin INTACH, Mizoram Chapter chuan Art & Culture Department thawhpuiin May ni 2, 2025 khan enchiangin mihring luruh 9 leh mihring taksa bung ruhro hrang hrang a awm tih an finfiah tih a sawi a. Heng ruhro te hi engtik hunlai ami nge tih zirchiang turin ‘Sample’ thenkhat chu Beta Analytic, Miama, Florida, USA-ah Carbon-14 dating tih tir tura thawn niin zirchian a nih hnuah heng ruhro te hi kum 1260 AD atanga kum 1320 AD inkar ami an ni tih a sawi a, heng ruhro te hi hnam ziarang leh nunphung mai bakah hnam chanchin zirchianna atana hmanraw tangkai tak a nih tur thu a sawi bawk.

INTACH, Mizoram Chapter hotute chuan heng ruhro te hi tute nge an ni tih leh eng hnam nge an ni tih zirchian zel a nih theih nan mithiam bik te sawmin DNA Analysis kalpui tum a ni tih an sawi bawk.