Sazu puang in Buh leh thlai tam tak a sehchhe tawh

Lunglei District chhunga khaw pahnih, Mamte leh Lungrang South khuaah Sazu puangin Buh leh thlai tam tak a seh chhe tawh.

Thudawn danin Mamte leh Lungrang South khuaa Lo neitute Buh leh thlai Sazu in a sehchhiatte hi Lunglei-a District Agriculture Office (DAO)-a thawktute chuan a hmunah kalchilh nghalin Sazu in Buh leh thlai a seh chhiat dan te an enfiah bakah khawtlang hruaitute hnenah Sazu Tur pein a hman dan tur an zirtir nghal a. Mamte khua bikah hian Loneitu chhungkaw 47 awmin Buh tin 46 hmun a zauvah Buhpui an ching a, Tin 6 hmun a zauvah Thar rang chingin Thar rang buh hi tin 5 hmun vela zau chu Sazu hian a seh chhe vek a, hei bakah hian Tin 25 hmun a zauva an chin Bekang pawh a seh chhe nasa hle a ni. Lungrang South khuaah hian chhungkaw 30 in thlawhhma lain, chhungkaw 8 thlawhhmaah Sazu hi a che a, Tin 6 hmun vela zau-a Buh vui te chu Sazu in an seh chhe tawh bawk a ni.

DAO Lunglei-a thawktute chuan tunlai hian an indaihlo hle tih sawiin, Loneitute buh leh thlai eichhetu Sazu chet velna ngaihven a ngaih bakah Digital Agriculture enfiah leh Agriculture Crop huntiam chhunga Survey a ngaih bawk avangin an buai hle tih an sawi a. Loneitute harsatna thlen zawnga Sazu chetna chu a rang thei ang bera Office-a hriattir turin an chah bawk a ni.