Ruihhlo do beihpui thlakna tur khuhhawn a ni
Mizoram-a ruihhlo do beihpui thlakna tur khuhhawnna chu nimin khan Home Minister K. Sapdanga hovin a Pisa-ah neih a ni.
Ruihhlo do beihpui thlakna tur khuhhawnna hunah hian Home Minister K. Sapdanga chuan Mizoram-ah ruihhlo a hluarin ruihhlo in nasa takin min tibuai mek tih sawiin, “Ruihhlo hluar hian kan khawtlangah harsatna tamtak min thlen mek avangin ruihhlo hluar dolet tur hian Mizoram Sawrkar leh Central YMA te chuan theihtawp an chhuah reng a. Chutih rual chuan awmze nei lehzual a ruihhlo dona kawnga hmalak a nih theih nan Mizoram Sawrkar chuan ngaihtuahna nasa takin a seng a ni,” a ti a. Ruihhlo laka kan ram a him theih nan September, 2025 atanga December, 2025 chhung hian Mizoram-ah Ruihhlo Dona Beihpui, ‘Operation Against Trafficking and Use of Drugs and Narcotics in Mizoram’ kalpui tum a nih angin September ni 1, 2025 hian a khuhhawnna (launching programme) hun hman a nih thu a sawi a ni.Kumin August 7-a Mizoram Sawrkar Home Department, Excise & Narcotics Department, Mizoram Police, SIB te leh Central YMA hruaituten awmze nei lehzuala ruihhlo do anih theihnan Meeting neiin Mizoram-a ruihhlo lo lut te hi Burma lam atangin a hlawmin a rawn lut a, chung a rawn luhna hmun 22 (sawmhnih pahnih) te pawh tarlan a ni a. Hei vang hian hmalakna tur hrang hrang duan niin Ruihhlo lo luhna hmun ni a hriat hmun 22 te tlawhchhuak a, a bulhnaia khua zawng zawngah Awareness Campaign neih nise an ti a. Hemi ang hian August 25-29, 2025 chhung khan he hmalakna hi kalpui a ni.
Hei bakah hian Mizoram kaltlanga a hlawma ruihhlo tawlhruk te hi Mizoram pawnah thleng thlain State dang atangin Mizoram-ah hmankhawp (consumable quantity) in a lolet leh thin tih tarlan a ni a. State dang atanga ruihhlo lo lut leh tur dang tur hian State dang nena kan inrina ah uluk taka lo ven a ngai tih hriain, hemi chungchanga hmalakna atan hian August 30, 2025 khan Home Minister ho hian Kolasib District-a Bairabi leh Vairengte te leh hmun hrang hrang tlawhin khawtlang hruaitute nen an inkawm bawk a ni.
He Meeting hian Ruihhlo do beihpui thlak nan hian sum leh pai mamawh a ni dawn tih hriain, Ruihhlo dona atana thawktute mamawh leina tur leh an tha tichak turin Sawrkar pawhin pawisa pawh a tul anga hman tur ruahhman bawk a. Mizoram Police hnuaiah mi 30 awmna Special Squad din niin he Special Squad memberte hi uluk taka thlanchhuah te an ni a, anni hian training tha tak an neih hnuah nimin atang khan an duty-na tur hmunah an duty tan ang a, khawtlang hruaitute leh YMA te nen thawkho in, ngawrh takin hma an la dawn a ni.