Hmunphiah leina tur hlanlet

Mizoram Handloom & Handicrafts Development Corporation Ltd. (ZOHANDCO) chuan Mizoram Agricultural Marketing Board (MAMB) atanga Hmunphiah leina tura an dawn Rs. 3,36,49,972/- chu nimin khan MAMB kutah an chhunglet.

Nimin khan Secretariat Conference Hall No. 2-ah Mizoram Agricultural Marketing Board (MAMB) meeting neih niin he hunah hian ZOHANDCO Managing Director LP. Lalchangkima chuan Hmunphiah leina tur MAMB atanga an dawn Rs. 3,36,49,972/- hi MAMB kutah a hlanlet a, Hmunphiah bikah MAMB-in Grade A leh B-a hralh tura ruahmanna a lo siam tawh chu Hmunphiah chingtute'n Grade-a thliar an harsat avangin MAMB chuan Grade sawi lovin kg-ah Rs. 80-a leisak vek a lo tiam tawh a. Hemi buaipui tur hian ZOHANDCO te kutah pawisa hlan a ni a, ZOHANDCO chuan khaw hrang hranga Hmunphiah hralh bang awm zawng zawng a lei zo vek a. Chung Hmunphiah a lei khawmsa a hralhchhuah lehna sum a hmuh let leh atangin Hmunphiah leina tur atana pawisa a lo dawn tawh zawng zawng chu ZOHANDCO chuan MAMB hnenah a hlan let leh a ni.

Hmunphiah hi kumthar 2026 February ni 1 atangin MAMB chuan Grading awm lovin a ro tha kg-ah cheng 80-in Secondary Collection Centre (SCC)-ah a lei dawn a. MAMB Meeting chuan Buyers/Sellers Meet leh Private Sector Round Table Conference neih hun tur atan kumin December ni 5 leh ni 6 chu a pawm a. Season thara inbuatsaihna chi khat atan MAMB chuan hlawk taka hman a tum a ni.

Nimin-a thutkhawm hi Agriculture & Farmers’ Welfare Department changtu Minister PC. Vanlalruata chuan kaihruaiin kumin 2025 chhung hian Hmarcha ro rate sawrkarin a bituk aia to vekin kuthnathawktu te'n an hralh zo thei tih tarlan a ni bawk.