Resolution a nih dan tur anga bawhzui a ni tih sawi

MNF party chuan MNF Sawrkar liamta ah khan Mizoram Assembly chuan FCAA 2023 dodalna Resolution a pass thu sawiin, a nih dan tur anga bawhzui a nih thu an sawi.

Nimin-a thuchhuah an siamah MNF party chuan MNF Sawrkar liamta ah khan Mizoram Assembly in Forest (Conservation) Amendment Bill, 2023 dodalna Resolution a pass thu sawiin, “A nih dan tur anga bawhzuiin Assembly Commissioner hmingin Secretary General, Lok Sabha hnenah thlen a ni a. Mizoram Chief Secretary pawhin bawhzuiin file te pawh a nih dan tur angin a kal a, MLA inthlanpui in a nang zui ta a ni,” an ti a. “MNF sawrkarin FCAA 2023 dodalna Resolution a lo pass tawh kha ZPM sawrkar lo ding ta hian a pawm zui ve mai tur a nih laiin, India ram venhimna kaihhnawiha sum hnuh luh theih an inbeisei vang chauhvin, a hmaa nasa taka an dodal FCAA 2023 chu Mizoram-a hman ve an duh leh ta thut a. ‘MNF sawrkarin FCAA 2023 dodalna Resolution a pass a, ZPM sawrkarin FCAA 2023 Mizoram a hman vena tur Resolution an pass thung a ni,’ tih hi thudik dinglai a ni,” tiin, an ti.

Hei bakah hian MNF party thuchhuah chuan Assembly Speaker Lalbiakzama chu Press Conference kova Chief Minister-in dawt chiang tak a sawi sawi mam sak tum-a puhin, “Speaker hian ama thu ngeia Press Conference-a a thusawite hi a sawi a nih phei chuan nihna hman sualna leh Speaker zahawmna venhim zawh lohna nasa tak anih avangin speaker atanga inhnukdawk ngam ngei turah MNF Party chuan a ngai a ni,” an ti.