Larsap in MJA te a kawm

Mizoram Larsap General (Dr) Vijay Kumar Singh chuan nimin khan Raj Bhavan-ah Mizoram Journalists' Association (MJA) General Hqrs. hruaite kawmin thil pawimawh hrang hrang a sawipui.

He inkawmna ah hian Larsap General (Dr) Vijay Kumar Singh chuan Chanchinbumite chu khua leh tuite zirtirna pek kawnga pawimawh tak an nih thu sawiin, ram hmasawn nana pawimawh leh mipui hriat tur tulte theihtawp chhuaha puangzar zel turin a chah a. Mizo thalai tam zawk sipai-a an luh theih nan Sawrkar-in Recruitment Office kaltlanga theihtawp a chhuah thu sawiin, Sipai tan tumte'n document felfai tak an neih a tul avangin Chanchinbumite chu hemi kawngah hian thalaite hriattur pawimawh leh tulte hrilh hriaa thahnemngai taka kaihruai turin a chah a ni. Hei bakah hian Larsap chuan Sawrkar laipuiin zirna tihhmasawn nan sum leh pai tam tak a sen thu leh Mizoram-ah School tha tak tak a din thu sawiin, Eklavya Model Residencial School, Kendriya Vidyalaya, Sainik School leh Jawahar Navodaya Vidyalaya-te chu mipuite'n an hriat chian lehzuala, an chhawr tangkai theih nana puanzar leh zirtir kawngah tan la turin a sawm nghal bawk.

He hunah hian Mizo thalai tam zawkte sipaia an luh theih nana pawimawhte leh tangkai lehzuala Army Recruitment Office, Aizawl hman dan turte sawiho a ni a. MJA hruaitute chuan Defence Study Tour kaltlanga ram venhimna kawnga hmunhma leh hmalakna pawimawh hrang hrangte an lo tlawh thin tawh dante tarlangin, zawngchhang tlak an tih thu Larsap hi an hrilh a. Journalist-te tana Defence Study Tour buatsaih a nih leh theih nana an hmalaknate tarlangin, a hlawhtlin ngei theih nan Larsap chu nana theihtawp chhuahpui turin an ngen a. Larsap chuan Defence Ministry-in kumtin Defence Study Tour leh Defence Correspondent Course a buatsaih thin thu sawiin, an dilna thlen chu theihtawp chhuaha lo bawhzui a tum thu a hrilh a ni.