HSA hruaitu ten Chief Minister hnenah an thlen

Hmar Students' Association (HSA) General Hqrs. hruaitute chuan nimin khan Chief Minister Lalduhoma chu a Pisa-ah hmuin thil pawimawh hrang hrang an sawipui.

He inkawmna ah hian HSA hruaitute hian Mizoram sawrkarin Mizoram leh Tipaimuk (Manipur) inkalpawhna pawimawh NH-2 (Formerly 54) a Tuivai Bailey Bridge (Unity Bridge) a dawh sak chungchangah lawmthu an sawi a, Mizoram Hmar lam inkalpawhna kawng a bik takin Serkhan - Bhaga Road-a Saipum - North Hlimen inkar leh Tuirial - Mauchar inkar kawng siamthat te, khaw thenkhat ah tui supply tha zawk a awm theina'n leh development chak zâwka kal theihna'n a hma laksak tûrin Chief Minister hi an ngen a. Kumin December 3-5 chhunga General Assembly leh Sikpui Ruoi an buatsaih turah khuallian turin an sawm bawk.

He hunah hian Chief Minister Lalduhoma chuan inkalpawhna tih hmasawna'n leh Zofate inpumkhatna tura hmalakna kal zelah Mizoram sawrkarin Aizawl leh Tuithaphai (Churachandpur), Manipur inkarah Helicopter Service tir an tum thu leh Churachandpur-ah Mizoram House sak thuai an tum thute HSA hruaitute hi a lo hrilh a ni.