Prime Minister lo zin tur atan inbuatsaih mek a ni

Karleh Inrinni, Sept. 13 khian Prime Minister Narendra Modi chuan Aizawl Lammual-ah Bairabi - Sairang inkar Rel kawng a hawng dawn a, inbuatsaihna ngawrh taka kalpui mek a ni.

Prime Minister-in Rel kawng hawnna hun a hmanna tur Lammual-ah hmunhma siam hna thawh mek a ni a, Lammual chhungah hian mipui tan luh phal a ni tawh lo a, a chhunga programme hmanna tur buaipuitute pawh uluk taka endik thin niin, hnathawkte chetvelna zawng zawng pawh CCTV hmanga vil reng a nih thu Aizawl SP chuan a sawi. Aizawl District Magistrate chuan thupek tichhuakin, September 13-a Prime Minister-in Lammual atanga Bairabi-Sairang inkar Rel kawng a hawn tur chu tluang taka neih a nih theih nan leh tha taka venhimna kalpui a nih theih nan September ni 4 atanga ni 15 chhung hian Aizawl District chhungah remote control hmang drone emaw, hetiang lam chi reng reng thlawhtir leh hman khap a nih thu a puang tawh bawk a. Traffic Sr. SP Ruatsanga Ralte pawhin Prime Minister lo zin turah hian Aizawl khawpuiah lirthei chetvelna a khaihlak châng a awm dawn tih tarlangin, lo inhmakhua turin Aizawl mipuite a ngen bawk a ni.

ICT Secretary leh Census Operations Director Amit Sharma chuan Rel kawng chu engkim peihfel thawkhat a nih tawh thu sawiin, inbuatsaihna chak taka kalpui niin karleh ni 13-a Prime Minister Narendra Modi-a’n a hawn theih turin Department hrang hrang chak takin an inbuatsaih tih a sawi a, tluang taka Rel a tlan nghal thei nan engkim inbuatsaih a ni tih sawiin, Mizo mipuite beiseina chu a takin hmuh theih ani thuai dawn tih a sawi a. He Rel kawng hi Mizoram ei leh bar kawnga hmasawnna leh dinhmun chawi kangtu a nih ngei a beisei thu pawh sawiin, hmundang nena inthlunzawmna pawimawh tak a ni dawn tih a sawi bawk.