Ration Card siamthat ah tih theih awm tawh

Food, Civil Supplies & Consumer Affairs Department chuan thuchhuah siamin, kumin March thla atanga Ration Card siamthat leh tihdanglam theih loh chu engemaw zat tihdanglam theih a nih tawh thu an sawi a; Ration Card thar siam leh chhungkuaa hming dah belh erawh tih theih a la nih loh thu a tarlang.

FCSCA Department thuchhuah chuan, Ministry of Consumer Affairs, Food and Public Distribution chuan Public Distribution System (PDS) hnuaia mipuite hamthatna turin SMART-PDS (Scheme for Modernisation and Reform Through Public Distribution System) a siam thu an tarlang a, “SMART-PDS hian a tum chu mipuite'n awlsam zawka Ration Card-a hming thlak, hming paih, insawn, Card thlak, Card print leh a dangte a huam a ni,” an ti a. SMART-PDS hman a nih dawn avangin kumin March thla atangin Ration Card khawih danglam theih a nih loh thu tarlangin FCSCA chuan, Application thar hi hman vat a nih theih nan Mizoram FCSCA department chuan theihtawpin hma a la tih an sawi a, tun dinhmunah Ration Card kaihhnawih thil engemaw zat tihdanglam theih a nih tawh thu leh tihdanglam tur nei tan mahni bialtu DCSO-ah ngaihven theih a nih thu a tarlang bawk.

Tun dinhmuna Ration Card siamthatna a tih theih tawh zingah hian Ration Card holder (hming neitu) thlak, Ration Card sawn, Ration Card tihtawp, Ration Card-a member paih leh Ration Card Print chhuah te a ni a, Ration Card thar siam leh chhungkua a hming dah belh erawh tih theih ala nih loh thu an sawi a ni.