Serchhip-a Mat Lui khuap tura hmalak mek niin tun thla ah DPR thehluh hman tum a ni
Niminpiah khan Serchhip Chhim Veng-a Lalpuithanga Hall-ah Mat Lui khuah tum chungchang ah hian he Tuihkuah (Dam) in a chawm tur Serchhip Zawlpui leh a chhehvel Zau hrang hranga Leilet leh Lo/Nul leh Sangha Dil siamtute nen inkawmhona leh inrawnkhawmna neih a ni a, he hun hi Irrigiation & Water Resource Depatment Serchhip-a Survey & Investigation EE, P.Lalnunthara chuan kaihruaiin Mat lui khuah chu Serchhip Bialtu MLA leh Chief Minister Lalduhoma pawhin a phurpui thu leh Bhramaputra Board kaltlangin phur tak leh chak taka hma a lakpui thu a sawi a. IRWD-a Surveyor Remsangpuia chuan Mat lui luan rek na lai ber, Hmawngawn Lui chhuah-a Mat Lui khuah dan tur chu tunlai thiamna hmangin kumin June-July thla chhung khan riahchilh a Drone & Ground Work (Survey) an lo tih tawh thu leh he Tuikhuah in a chim turte, Tuikhuah in Zawlpui Phai leh a chhehvel Zau hrang hranga tui hnianghnar a pek dan tur te an lo zirchian tawh thu a sawi a. Chuta Data pawimawh an lakkhawm zawng zawngte chu Geographic Information System (GIS)-ah dahluh vek anih tawh thu leh tun thla, September 15 hma hian Detail Project Report (DPR) thehluh anih dawn thu a sawi bawk a ni.
Mat Lui khuah (Multipurpose Dam) Survey report atanga lan danin Mat Multipurpose Dam hi meter 29-30 a sang in khuah tura ruahman a ni a, Satellite Survey atanga a lan danin Tuikhuah (Dam) hian a hnar lam KM 3 a thui a chim thei dawn a, hemi chungchang hi Irrigation Department hotute leh Chhiahtlang a ram neitute chuan sawihoin an thlirho nghal a ni. Mat Multipurpose Dam hian Leilet (WRC) Hectare 500 a zau leh Agri & Allied (Horti, Fisheries etc.) ram Hectare 300 a zau- Zehtet atanga Thinglubul Zau thleng bakah Bungtlang ram thlengin ram Hectare 800 zet a zau chu Main Reservoir Tank 20 chuang hmangin Tui hnianghnar pek theih anih tawh dawn bakah Hydro Electric Power Plant hmanga Kawlphetha pawh siamchhuah theih tur a ni a, hei bakah hian Mizoram 'Peace City' Thenzawl tan pawh tui in tur hnianghnar zawk a pe tel thei tura beisei a ni
He inrawnkhawmna hunah hian he tuikhuah peihfel anih hun, Tui hnianghnar zawk a awm huna tuikawng (Water Channel) kal dan turte, Zau hrang hranga tui sem darh (Distribution point) dan tur leh hlawk zawk leh regular zawka buh leh thlai thar dan turte pawh an sawiho a ni.