Ramchhung hmundangte rualin Serchhip-ah Rashtriya Poshan Maah hawnna neih a ni

Nimin khan Mizoram pumah Rashtriya Poshan Maah (National Nutrition Month) hawnna hun hman a ni a, Serchhip-ah pawh Rashtriya Poshan Maah hawnna hun hi hmangin Anganwadi Centre hrang hrangah Infant and Young Child Feeding (IYCF) chungchang inzirtirna leh Body Mass Index (BMI) Screening neih nghal a ni.
Rashtriya Poshan Maah (National Nutrition Month) vawi 8-na hi Serchhip-a District Programme Office, Women & Child Development bakah Serchhip District chhunga ICDS Project pahnih- Serchhip leh East Lungdar ICDS Project te chuan hmangin Serchhip Kawnpui Anganwadi Centre-ah District Programme Office leh ICDS Project te chuan hun an hmang a, he hunah hian Mission Shakti-a DMC Lalvensanga chuan Rashtriya Poshan Maah hi rampum ah kumin atan hman tan a nih leh tak thu leh thla thar October ni 16 thlengin nu leh nausen hriselna kawnga chaw tha ei pawimawhna leh naupang enkawlna kawnga thil pawimawh hrang hrang inzirtirna neia hun hman a nih dawn thu a sawi a ni.

He hunah hian Poshan Abhiyaan-a Block Coordinator Lalnundiki pawhin Rashtriya Poshan Maah pual hian nimin khan Infant and Young Child Feeding (IYCF) chungchang inzirtirna leh Body Mass Index (BMI) Screening neih a nih thu sawiin, nu, nau pawm ten nausen hnute pek dan dik an hriat a pawimawh thu leh nausen hriselna atan thianghlimna a pawimawh dan te a sawi a. Tunlaia naupang te eitur kan pek tam tak chu an hriselna atana tha lo a nih thu leh Phone kan entir nasa lutuk te chu an tana thalo a nih theih thu a sawi a, hemi kawngah hian nu leh pa te an fimkhur a pawimawh thu a sawi bawk a ni.

Serchhip-a Rashtriya Poshan Maah hawnna hun hi Poshan Abhiyaan District Coordinator James Lalremliana chuan kaihruaiin hun hman zawh a nih hnu hian Body Mass Index (BMI) Screening neih chhunzawm nghal a ni a, hetiang bawk hian Serchhip District chhunga Anganwadi Centre hrang hrangah pawh hun hman a ni bawk.

Rashtriya Poshan Maah (National Nutrition Month) hawnna hi Aizawl-ah chuan Dawrpui Multipurpose Centre-ah hman niin Sikul naupangte leh College naupangte nen ei tur mawm, al leh thlum eiluat in hrisel lohna a thlen theih chungchang zirtirna neih a ni a. He hunah hian Nutrition Counselling-na hmun te, Nutrition Hub - Ei leh in hrisel tarlanna hmun leh Health Checkup - Anaemia Test, Weight leh BP check-na hmun buatsaih a ni a. Prime Minister hova Rashtriya Poshan Maah 2025 hawnna neih chu live telecast-a chhim a ni bawk.