PM dawnsawn dan tur sawiho

September ni 13, 2025-a Sairang Railway Station hawng tura Prime Minister Narendra Modi lo kal tur lo hmuah dan tur leh a cham chhunga hun a hman dan tur ngaihtuahin nimin khan Chief Secretary Khilli Ram Meena IAS hovin sawrkar mi pawimawh te chu Secretariat Conference Hall-ah an thukhawm a. Prime Minister rawn zin huna venhimna tha taka kalpui dan tur te, Lengpui, Thuampui leh Lammual-a hun hman dan tur te leh Mizoram kutchhuak thuam, thlai leh thei chi hrang hrang pholan dan tur te sawi a ni.

Hei bakah hian hun pui ber hmanna tur Lammual-ah hian Aizawl District huamchhunga Sawrkar hnathawkte, Kuthnathawktute, School zirlai leh College zirlaite an tel theih nana ruahmanna siam dan tur sawi a ni bawk a. Veivahna kawnga harsatna a awm loh nan lirthei hunna tur hmun ruahman dan tur te, kawng leh a chhevel tihfai leh chei dan turte pawh he hunah hian sawiho a ni bawk.