PACS a thawktute tan MCAB in Training buatsaih

Mizoram Cooperative Apex Bank Ltd. chuan nimin khan ni hnih awh tur Primary Agricultural Credit Society (PACS) kaihruaitu turte tan Training an buatsaih.

Mizoram khaw hrang hranga PACS (Primary Agricultural Credit Societies) te kaihruaia kawng kawhhmuh tura Apex Bank Branch hrang hranga hnathawktu thlan bik te tana Training hi Agriculture & Farmers’ Welfare Department Training Hall, Aizawl-ah neih niin he hun hmanpuitu Mizoram Cooperative Apex Bank Ltd. Chairman Lalnunsanga chuan Mizoram-a PACS 124 te tha taka enkawl thei tura inbuatsaih turin he huna tel te chu a chah a. He hunah hian PACS enkawltute hriattur pawi-mawh hrang hrang- Common Accounting System, Non-Credit Business, PACS Computerization leh Audit Report chungchang te inzirtirna hun hman a ni a, hei hian thingtlang hmun hrang hranga PACS te mamawh nasa taka phuhru thei tura beisei a ni.

Primary Agricultural Credit Societies (PACS) te hi dan ang thlapa pawisa khawl leh puk theihna niin Mizoram khaw hrang hrangah State Co-operative Societies Act hnuaia din an ni a. Mizoram hmasawnna rualkhai taka a kal theihna tura hmanraw pawimawh tak an niin, tun dinhmunah PACS hnuaiah hian member 30000 (sing thum) vel awmin; member-te atangin Deposit cheng vbc. 39 vel nei tawhin, Loan cheng vbc. 28 vel Member te an puk tir mek a ni. Hetih rual hian PAC enkawltute hi Banking a thiamna thui tak nei bik lo, Society mite an nih avangin Mizoram Cooperative Apex Bank Ltd. chuan an mamawhna taka lo kaihhruai turin thawktute tan training hi a buatsaih a ni.