Official Resolution dah thut mak a tih thu sawi

MNF Legislature Party Secretary leh Thorang Bialtu MLA R. Rohmingliana chuan Assembly Session neih zawh taka Forest (Conservation) Amendment Act, 2023 adopt tura Sawrkarin Official Resolution an rawn dah thut kha mak a tih thu nimin-a Mizo Hnam Run, Aizawl-a Chhung Inkhawm an neih ah a sawi a. Bill pali (4) lut te chu a hma daiha an pek thu leh an zirchian hman thu sawiin, chutihlaiin, he Adopt tur Resolution hi August ni 27-a sawiho tur ni si in ni 26 zanlai velah an dah chauh niin a sawi bawk. MNF Legislature Party Secretary chuan Sawrkar hmasain he Dan an adopt duhlohna Resolution chu Legislative Assembly Secretariat-in Chief Secretary-ah an thawn nghal nia sawi bawkin, “Lok Sabha Secretary General hnenah an thu passed kan duhlohna leh Mizoram-ah hman ve kan remtih loh thu House-ah lungrual takin kan passed a, ziakin an thawn thla nghal a nih kha,” a ti bawk.