Kawng chhia State sawrkar mawhphurh ni lo tih sawi

PWD Minister Vanlalhlana’n Kawnpui leh Khamrang inkar National Highway-06 kawngpui chu July ni 7, 2025 khan NHIDCL-in Mizoram PWD kut atanga an lak thu leh kawngpui chhiat chhan chu State sawrkar mawhphurhna a nih loh thu a sawi.

    Mizoram Assembly Session neih zawh takah PWD Minister hian Opposition Leader Lalchhandama Ralte-in ziaka zawhna a siam chhangin helai kawng chhiat chhan hi State sawrkar mawhphurhna a nih loh thu a tarlang a. PWD Minister chuan nikum October ni 7 khan NHIDCL hnenah Kawnpui leh Khamrang inkar NH-06 kawngpui hlanna thawn fel vek a nih tawh thu leh nikum October ni 28 khan NHIDCL hnenah hian kawngpui inhlanna chu thawnlet tura an tih thu leh kumin January ni 3 leh March ni 26 khan an thawn nawn leh thu a sawi a; NHIDCL lam hian July ni 7 khan kawngpui inhlanna lehkhaah an sign ve chauh thu sawiin, Mizoram PWD-in NHIDCL kuta NH-06 an hlan ni hi March ni 26 ni mah se, NHIDCL in an kuta an lak ni erawh July ni 7 a nih thu a sawi bawk.