LESDE Minister in Maharashtra Labour Minister kawm

Labour, Employment, Skill Development & Entrepreneurship (LESDE) changtu Minister Lalnghinglova Hmar chuan Maharashtra Labour Minister Akash Fundkar chu kawmin thawhho dan tur an sawidun.

Niminpiah-a Maharashtra Labour Minister Office, Mumbai-a an inkawmna ah hian LESDE Minister Lalnghinglova Hmar chuan Maharashtra chu state lian leh hausa, Labour chungchangah pawh kalphung ngelnghet leh felfai nei a nih thu sawiin, Mizoram tan zir tur engemaw zat a awm tih a sawi a. State pahnihin ‘labour’ an kalpuinaa an tihdan tha lai (best practice) ve ve te inzirtawn a duh thu thlenin thawhho dan tur hrang hrang an sawidun a ni.

Maharashtra Labour Minister chuan Mizoram Minister chu tha taka lo dawngsawngin an State-a Labour chungchang tha taka an kalpui dante zirchiang turin Mizoram sawrkar Official-te a sawm a, theihtawp chhuahpui a tum thu a sawi bawk. Minister pahnihte hian Labour kaihhnawih bakah CSR Fund lam hmalak dante pawh an sawidun a; Mumbai sumdawnna khawvela Mizoram tana tangkai turte inhmelhriattir leh kawng kawhhmuh kawngah Akash Fundkar chuan hma a lak tur thu a sawi bawk a ni.

Sports Minister ni bawk Lalnghinglova Hmar hian nimin khan Tata Trust-a CEO Siddharth Sharma chu Mumbai-a Tata Trusts Office-ah kawmin Aizawl-a Badminton High Performance Centre sak chungchanga thawhho dan tur an sawidun bawk a. High Performance Centre-ah hian Badminton Court 10 awm tura ruahman a ni a, a senso tur zat leh a sum hmuhna turte an sawi dun a; Tata Trusts lam hian Mizoram-a Badminton hmunpui sakna tur a puitlin theihna turin theihtawpa puih an tum a, a kalpui zel dan sawiho leh tura tih niin Minister hi Mizoram State Sports Council Secretary Henry C. Lalrawnkima chuan a tawiawm a ni.