Mizoram-a FOCUS 2.0 hmalakna chu Handholding Scheme nena kal dun tura tih a ni

Mizoram-a FOCUS 2.0 hmalakna tura thuneitu sang, Society for Climate Resilence Agriculture in Mizoram (SCRAM) chu nimin khan thukhawmin FOCUS 2.0 hmalakna chu Handholding Scheme nena kal dun tura kalpui leh an remti.

Mizoram-a FOCUS 1.0 hnathawh hun chhung a zawh tawh avangin Mizoram sawrkar chuan FOCUS 2.0 kalpui leh turin hma a la mek a, FOCUS 2.0 hmalakna tura thuneitu sang, Society for Climate Resilence Agriculture in Mizoram (SCRAM) chu nimin khan an Chairman leh Chief Minister Lalduhoma hovin Planning & Programme Implementation Department Conference Hall-ah thukhawmin FOCUS 1.0 hnathawh hun chhung a zawh tawh avangin Mizoram sawrkar chuan FOCUS 2.0 hmalakna hi Handholding Scheme nena kal dun tura kalpui leh a remti a. International Fund for Agricultural Development (IFAD) sum cheng vbc. 380 hman phalna chu State sawrkar-a Finance Department pe tawhin, sawrkar laipui lamah dilna thehluh mek a ni a. Department hrang hrangten hma an lakhona (convergence) a nih angin Planning & Programme Implementation Department hnuaia kalpui tur a ni ang.

FOCUS 2.0 thuneitu sang ber, Governing Council thar dinna Notification hi August ni 20 khan tihchhuah niin, a hming hi ‘Society for Climate Resilient Agriculture in Mizoram (SCRAM)’ a ni a. Chief Minister chu Ex-Officio Chairman niin, Planning Secretary chu Ex-Officio Member Secretary a ni a. FOCUS 2.0 hi kum ruk (6) chhung kalpui tur a ni ang.

Nimin-a thutkhawm ah hian  FOCUS 2.0 project mil turin kalphung thenkhat thlak an remti a, nihna hming (nomenclature) thenkhat thlak pawh rem tiin, FOCUS 1.0 atanga bungrua leh hmanruate chhawm chhoh dan turte an rel a, State Level leh District Level-a thuneitu turte leh Village Level-a thuneitu turte an rel a, hnathawktu tur pawhkhawm dan tur leh a tul anga lak dan turte pawh an sawi bawk.

FOCUS 2.0 hi Mizoram District 11-a khaw 700 tuama chhungkaw 75000 huam a kalpui tur a ni a. Ram nei lo (landless farmers) chhungkua pawh chhungkaw 7000 target siam a ni a. A chhawrtu (beneficiary) zatve hi hmeichhia ni thei tura duan a ni bawk. Nimin-a thutkhawm ah hian Agriculture Minister PC. Vanlalruata; Land Resources, Soil & Water Conservation Minister, Lalthansanga,  Adviser to CM atangin TBC. Lalvenchhunga leh Dr. KC. Lalmalsawmzauva bakah Chief Secretary Khilli Ram Meena leh Member dangte an tel bawk a ni.