Mizoram-ah kum 25 chhungin Heroin leh Meth man a tam

Kum 25 chhungin Mizoram-ah Heroin kg 248 chuang leh Methamphetamine kg 575 chuang man a ni tawh a; kumin ah January atanga July thla chhung khan Heroin kg 26 chuang leh Meth kg 155 chuang man a ni tawh bawk.

Excise & Narcotics Minister Lalnghinglova Hmar chuan Assembly Session neih zawh takah khan MLA Clement Lalhmingthanga zawhna ziaka chhangin, Excise & Narcotics Department chuan kum 25 kalta, kum 2000 atanga 2024 chhung khan Heroin kg 248.115 leh Methamphetamine kg 575.614 an man tawh thu a tarlang a; Heroin leh Meth man zat hi kum 2019 atang khan a pung nasa hle a ni.

Excise Minister tarlan danin kum 2019 hma lam kha chuan Heroin hi kum khatah kg 10 aia tam man a awm ngai lo a, kum 2019 hnu lamah erawh kumtin kg 10 chunglam vek man niin, kum 2023 phei kha chuan kg 76.058 man a ni a, kum 25 chhunga Heroin man tam ber kum niin kumi ah thla 7, January atanga July thla chhungin kg 26.214 man a ni tawh bawk.

Meth hi kum 2019 hma lamah khan kum khatah kg 6 aia tam man a ni ngai lo bawk a, kum 2019 hnulamah chuan kumin thlengin kg 12 atanga kg 155 inkar man thin a ni thung a. Kumin kum kal mekah thla sarih, January atanga July thla chhung khan Meth hi kg 155.824 man a ni tawh a, thla 7 chhung lek hian kumin hi Mizoram-a Meth man tam ber kum a ni tawh a ni.