Mizoram-a Cosmic Class hmasa ber hawn a ni

Lunglei Deputy Commissioner (Bawrhsap) hmalaknaa Mizoram zirna In-a vansang chanchin zirna hmun bik - Cosmic Class (Astronomy Lab) hmasa ber leh Lunglei District leh Lungsen Aspirational Block-a zirna tihhmasawnna tura hma lakna hrang hrangte chu nimin khan School Education Minister Dr. Vanlalthlana chuan a tlangzarh.

Education Minister hian Govt. Leitlangpui High School, Lunglei-ah ‘Cosmic Classroom’ hawngin Lungsen Higher Secondary School leh Govt. Middle School, Tlabung-a ‘Cosmic Classroom’ te chu ral atangin (virtual mode-in) a hawng thung a. Hemi puala inkhawm Lunglei DEO Conference Hall-a neih ah Lunglei District leh Lungsen Aspirational Block huamchhunga zirna tihhmasawnna tur ruahmanna hrang hrang – Learning Bridges [a laklawha zirna bansan (dropout)-te’n zirna an chhunzawm leh theihna tura hmalakna] te, Book Nest Initiative [thingtlang zirlaite tana zirlaibu leh thawnthu bu hlui khawnkhawm] te, English Language Foundation [Primary School thlan bika zirlaite tana English bulthut zirna] te, Project Period Pride [Hmeichhe zirlai naupangte zinga hmeichhe hun bi kaihhnawih hriselna leh thianghlimna (menstrual health & hygiene) chungchanga hmalakna] leh Money Wise [sum hman leh enkawl dan inzirtirna (financial literacy)] te a hawng bawk.

He hunah hian Miniter chuan a laklawha zirna chawlhsan naupangte hnenah School an kai leh theih nan thirsakawr (bicycle) semin, Book Nest Initiative hnuaia lehkhabu sem turte a dawngtute kutah a hlan a. Sawrkar High School leh Higher Secondary Cchool zinga HSLC & HSSLC (Science) Exam Centre-te hnenah Science practical exam changtlung zawka kalpui a nih theih nan Directorate of School Education atanga Science Lab. Equipment engmaw zat a sem nghal bawk a ni.

Nimin-a hawn tak Cosmic Class hi zirlaite'n Ni, Thla, Arsi leh van thengreng chanchin a lem hmuh leh khawih theih nena an zir theih nana Astronomy Lab. atana pindan (classroom) cheibawl niin, Lunglei District Bawrhsap bultumin, School Education Department, Lunglei leh AstroScape, New Delhi te nen tang tlanga buatsaih a ni a. Mizorama Astronomy Lab hmasa ber atan Lunglei District chhung hmun pathum - Lunglei, Lungsen (Aspirational Block) leh Tlabung-ah te dah a ni a. Hemi atana classroom cheibawl hna hi AstroScope chuan thawkin, hmanrua chi hrang hrang - Telescope lian tha tak bakah, Astronomy leh Science zirna hmanraw hrang hrang a thlawn vekin an chhawpsak a. AstroScape neitupa Aryan Mishra hi van thengreng lam zirna lama mi hratkhawkheng, kum 14 mi lek a nih laia arsi keh them (asteroid) hmuchhuak tawh niin, India rama thingtlang sikul 320 chuangah Astronomy Lab (Cosmic Class) hi an siam tawh a ni.