MSU in DP&AR Minister hnenah an thlen

Mizo Students’ Union (MSU) General Hqrs. hruaitute chuan nimin khan DP&AR Minister K. Sapdanga chu hmuin Centraly Sponsored Scheme (CSS) hnuaia hnathawkte chungchang an sawipui a, MSU chuan tunhnaia CSS hnuaia hnathawkte nawrhna avanga zirna In hmun tam tak a khaihlak leh Zirlai ten an tuar tih an hriatin pawi an tih thu sawiin, CSS hnuaia hnathawk mek te chu an dinhmun zirchian sak a, Sawrkar in Regularization Scheme 2024-a siam hmanga tling leh Dan ang thlapa lakluh te chu CSS Employee te phut anga a ranglama tih hlawhtlin sak turin an ngen a ni. Hei bakah hian MSU chuan tunhnaia Asst. Professor hna lak tur post 33-a advertisement chhuak mekah RUSA hnuaia Asst. Professor hna thawk mek ten an dil ve tih hriat a nih thu sawiin, heng RUSA hnuaia thawk mek te hi Dan ang thlap leh MPSC kaltlanga lak, RUSA hnuaia sawrkar in ama hnuaia a chhawr chhunzawm tura ‘Binding Term and Condition’ felfai tak a neih thlap te an nih avangin tuna Asst Professor hna lak tur exam buatsaih a nih hmain Dan ang a lak RUSA Asst. Professor te hi ti nghet turin an ngen a. DP&AR Minister chuan RUSA Asst. Professor te hi a hma lama an ngheh theih na turin hma a lo lak tur thu a lo hrilh a ni.

MSU hruaitute chuan Advertisement mumal pawh awm lo leh DPC mumal pawh awm lova Sawrkar hnuaia hnalak tam tak, Regularization Scheme 2024 pha lo te chu Sawrkar pawhin ti nghet fo lo turin Minister hi an ngen a, Quality Education an tlangaupui lai leh lehkha thiam tak tak zirlai ten an thawhrim rah ngei an seng theihna turin Dan ang thlapa sawrkar hnalak reng reng kalpui tur in an ngen a, sawrkar hna reng reng, a nghet leh nghet lo pawh Dan ni lova lut emaw, luh tum an awm chuan MSU chuan engtiklai pawinn a do tlat tih an sawi a ni.