Health Minister in Bal zirchianna Report a tlangzarh

Health Minister Lalrinpuii chuan nimin khan a Pisa-ah Mizo thlai chi khat, Bal chungchang zirbingna ‘Research on Phytochemical Constituents & Galactagogue properties of Colocasia esculenta (Taro) and determination of its nutritive value’ report bu chu a tlangzarh.

Report bu tlangzarh paha thu a sawi ah Health Minister Lalrinpuii chuan Mizo chaw lar tak Bal zirchianna a awm thei chu lawmawm a tih thu leh hemi kawnga hmalatute chu fakawm a tih thu a sawi a. Bal chu Mizo culture a bet tlat a nih thu leh a thatna chi hrang hrang tlang hriat mai ni lova, research hmang ngeia hmuhchhuah a ni chu a hlut hle tih sawiin, packaging leh marketing kawngah pawh a 'nutritional value' nena tarlan thlap a ni thei tur chu lawmawm a tih thu a sawi bawk.

Mizoten thlai zinga kan ei lar tak Bal hi chaw tha a nih mai bakah nu hnute tui a ti tam thei tih sawi a awm avangin Mission Foundation Movement chuan zirchian tul an ti a. Ministry of Tribal Affair hnuaia Support to Tribal Research Institute Scheme hnuaiah kum 2022-23 chhung khan Social Welfare & Tribal Affairs kaltlanga research hna hi thawh a ni a. He zirbingna hi Laithangpuii College of Pharmacy-a Faculty leh Research Team ten kum khat chhung ngawrh taka beiin Mizoram University, Mizoram Food Processing Research and Training Centre, RIPANS te leh NIPER Guwahati ten Technical Support an pe bawk a ni.

He research hian a tum ber chu Bal-ah hian nu hnute tui ti tam theitu compound-a awm dan zirchian a ni a. Compound awm zawnchhuah nan Preliminary Phytochemical screening leh Liquid Chromatography- Mass Spectroscopy hman a ni a. Nutritional Composition hi Association of Official Analytical Chemists in an recommended method hmanga zawn a ni a. He zirbingna in a hmuhchhuah tlangpui te chu: Balah hian compound thenkhat alkaloids, flavonoids te leh glycosides a awm a. Heng compound te hi mihring tana chakna a thlen theih piah lamah nu hnute tui a ti tam theia ngaih a ni. He compound te hi then darh a, zirchianna ah chuan natural compound Luteolin 6, 8-C-diglucoside a awm tih hriat a ni a. Computer-based studies neihnaah he compound hi mihring taksaa receptor-ah a bei thei a ni tih zirchhuah a ni a, chu chuan hnute tui a ti tam thei tura rin a ni.

Bal nutritional value hi chi thum chips, powdered leh chhuma test a ni a. Hetah hian Bal chhum hi regular taka ei atan a him bakah a chaw tha a awm tih hmuhchhuah a ni a. Bal chhum hi Zemabawk-a nu hnute tui pe lai mi sawmthum hnenah 100 gram in nitin thla hnih chhung pek a ni a. Hemi chhung hian kartin Survey neih thin a ni a, chu tah chuan 57% in an hnute tui a tipung tih hmuhchhuah a ni a, hnute tui nei ngai lo pathum zingah pakhat in a neih phah bawk a ni.