Forest Conservation (Amendment) Act, 2023 ngaihtuah tha leh turin ZORO-in sawrkar an ngen
Zo Re-unification Organisation (ZORO) chuan Forest Conservation (Amendment) Act, 2023 chu kan ram leh hnam tan a him lo nia an hriat thu sawiin, hemi chungchangah Special Assembly ko a ngaihtuah tha leh turin sawrkar an ngen tih an sawi.
ZORO hian nimin Sept. 2, 2025 khan Office Bearers Meeting neiin Mizoram Sawrkarin Forest Conservation (Amendment) Act, 2023 a adopt chungchang chu an sawiho tih an sawi a. FCA Act, 2023 hian Sawrkar laipui thuneihna sang tak pein Section 2 siam that hian ram leilung fate tan harsatna namen lo a thlen ta niin an sawi a. FCAA 2023-in ngaihhnathiam (exempt) tura a dahah hian International boundary atanga km 100 chhung chu Central Sawrkarin a duh anga a hman theih turin State sawrkar leh Village Council/Gram Sabha, NGO te rawn hauhlo pawha a hman theih turin thuneihna a lak thu leh Forest Clearance lak buai ngai hauh lovin hma a la thei niin an sawi a. Hei bakah hian FCAA 2023 hian Indian Constitution Article 371G in kan in humhimna tura Dan min pek zawng zawng a kalh fai vek nia sawi bawkin, Indigenous Peoples chanvo chhuhsakna niin an sawi a ni.
Hei bakah hian ZORO chuan FCAA 2023 hian Forest dweller-te dikna chanvo a pek pawh a ti derthawng nia sawiin, Indian Constitution Article 244-in Fifth leh Sixth Schedule in Autonomy leh Right a siam sak ADC, UT leh State chanvo a chhuhsak niin an sawi a, Indian Constitution Article 19 pawh bawhchhiain, Freedom of Residence and Settlement, Freedom of Occupation, Trade, Profession te a bawhchhia tih an sawi a, heng bakah hian India Constitution Article 21-in chanvo min pek te a bawhchhia niin an sawi bawk.
ZORO chuan FCAA hi Supreme Court-a ngaihtuah lai mek a nih thu leh Court pawhin thutlukna a la siam theih loh laia lo pawm ngawt chu a fel lo hle tih sawiin, “Keini Zo Re-unification Organisation (ZORO) chuan kan ram leh hnam tan a him lo nia kan hriat avangin he Act hi kan pawm thei lova, Mizoram Sawrkar hian Central lam beng a thlen hma ngeia ngaihtuah tha leh tur leh a tul anga Special Assembly hial pawh ko-a ennawn leh turin kan ngen a ni,” an ti.