Minister in Lunglei-ah I&PR leh MJA te a kawm

Information, Public Relations, Printing & Stationery (IPRP&S) Minister Dr. Vanlalthlana chuan nimin zing khan Lunglei Circuit House-ah Mizoram Journalists' Association (MJA), Lunglei District Member-te leh Information & Public Relations (I&PR) Office, Lunglei-a thawktute kawmin, thingpui a inpui a. He hunah hian Minister chuan Lunglei-a I&PR leh MJA te'n thawh-hona tha tak an neih chu vawngnung zel turin a chah a. Sawrkarin Journalist-te tan hamthatna tur ruahmanna hrang hrang a kalpui tih sawiin, Journalist-te chu mipuite'n sawrkar hmalakna an hriat theih nan leh an tana hamthatna ruahmante a chawr tur takte'n an chhawr theih nana puanzar kawngah theihtawp chhuah zel tur leh a tulnaah chuan sawrkar pawh finchhuah zel turin a chah a. District MJA member-te leh I&PR Office-a thawktute'n an mamawh leh ngaih pawimawh a hnena an thlente chu a theih anga bawhzui a nih tur thu a sawi bawk a ni.

He hunah hian Lunglei DIPRO C. Lalhruaitluanga chuan Lunglei-a I&PR Office dinhmun tlangpui tarlangin, Office tihchangtlunna tur leh mamawh an neih hrang hrangte a lo thlen a. Minister chuan Department tichangtlung tura ruahmanna hrang hrang siam a nih thu a sawi bawk a. MJA Lunglei District President H. Lalthan-sanga chuan Minister-in inkawmna hun remchang a siam avanga lawmthu sawiin, MJA Lunglei dinhmun tlangpui a tarlang a. MJA member-te chuan Journalist-te hamthatna leh hmasawnna tur te, sawrkar nen thawhhona tha a awm theihna tur leh ram hmasawnna tura an ngaih pawimawh hrang hrangte Minister hi an sawipui bawk a ni.