Rel kawng in hmasawnna a thlen dawn niin BJP President in a sawi

BJP Mizoram State President Dr. K. Beichhua chuan naktuk, Sept. ni 13-a Prime Minister Narendra Modi-a’n Bairabi atanga Sairang Rel kawng a hawn tur chuan Aizawl chu Railway Map-ah a awm tir ve tawh dawn tih sawiin, “Hmasawnna tam tak a thlen dawn a ni,” a ti. Nimin khan Aizawl-a BJP Office, Mipui Run-ah thuthar thehdarhtute kawmin BJP President Dr. K. Beichhua chuan Bairabi atanga Sairang Rel kawng hawng tura India ram kilkhawra awm Mizoram-a Prime Minister Narendra Modi-a a lo kal tur chu lawmawm an tih thu sawiin, Mizorama tute pawh an lawm a rin thu a sawi a, Aizawl chu Railway Map-ah a awm ve tawh dawn tih sawiin, Hmarchhak State khawpui zingah Rel kawngin a pawh 4 zingah Aizawl a tel ve tawh tur chu ropui an tih thu leh inkalpawhna lamah leh kawng hrang hrangah hmasawnna tam tak a thlen dawn thu a sawi bawk.