Mahni ke-a din tumte tan Bana kaih (Hand Holding) Scheme chu duan a nih thu Minister in a sawi

Cooperation Minister PC.Vanlalruata chuan tunlai khawvelah sawrkar hna a vang em em tih sawiin, mahni ke-a din (Self-employed) na tur kawng kan dap a ngai tawh tih a sawi a. Mahni ke-a din tumte tan Bana kaih (Hand Holding) Scheme chu duan a nih thu a sawi bawk.

International Year of Cooperatives 2025 denchhenin nimin khan Govt. Aizawl College Conference Hall, Mualpui-ah Cooperatives Awareness Programme hman niin he hun a hmanpuina ah Cooperation Minister PC.Vanlalruata chuan UN in ‘International Year of Cooperatives’ hi tum hnih ngawt a puan tawh thu a sawi a. Tunlai khawvelah sawrkar hna a vang em em tih sawiin, “Mahni ke-a din (Self-employed) na tur kawng kan dap a ngai tawh a. Mahni eizawnna insiam chauh ni lovin, midang te tana eizawnna siamsaktu ni thei tur khawpa kan taihmak a, kan inchhiar zaua, kan huaisen a ngai,” a ti a. “Vawiin kan College zirlai duhawm tak tak; Ruihhlo in a la tibuai ve loh te hian Cooperatives hi lo belchiang ula, Cooperatives kaltlang hian Self-Employment nei turin rilru leh ngaihtuahna lo seng tawh rawh u. Chutiang mi in nih chuan ‘Bana kaih (Hand Holding) Scheme’ hi in tana duan a ni tih hre rengin; Cooperatives hmang hian Mizoram tha zawk siam i tum ang u,” tiin he huna kalkhawmte chu a sawm a ni.

Nimin-a he hun hman hi Registrar of Cooperative Societies John LT. Sanga chuan kaihruaiin khual zahawm nia he hun hmanpuitu Cooperation Department-a Commissioner & Secretary Udit Prakash Rai IAS pawhin Cooperatives chu dan leh hrai felfai tak hnuaia intel-khawm a, pawl (Society) anga sumdawnna a nih thu a sawi a. Mizote chu hnam inpawh tak, a huho a thil tih thiam leh nuam ti mi hnam an nih thu sawiin, “Cooperatives hi in kalna tur chi tak a ni a, in tan chuan kumtin hi Year of Cooperatives a ni mai. Chuvangin College zirlai leh thalai te hian Cooperatives movement hi lo bel chiang a, hmang tangkai turin ka sawm che u a ni,” a ti. He hunah hian mithiam hrang hrang ten zirtirna an pe bawk a ni.