Bharat Darshan Tour hmanga Delhi kal tur zirlai naupang 100, Zirtirtu 8 leh Tour Guide te vailiam

Ministry of Home Affairs (MHA) hmalakna hnuaia Border Security Force (BSF) ruahman, Bharat Darshan Tour hmanga Delhi kal tur zirlai naupang 100, Zirtirtu 8 leh Tour Guide-te chu chu nimin khan Larsap-in Raj Bhavan atangin a vailiam.

Bharat Darshan Tour hmang tur zirlaite vailiamna hun Raj Bhavan-ah neih ah hian Larsap General (Dr) Vijay Kumar Singh chuan Sawrkar laipui, Ministry of Home Affairs leh BSF te hmalakna hnuaia Mizoram naupang 100 leh zirtirtu 8 te tana Bharat Darshan Tour buatsaih a ni chu lawmawm a tih thu a sawi a. Tour ruahman chu thil hautak leh ngaihtuah tur a tam thu sawiin, a hlawhtlin theih nana MHA, BSF leh buaipui dangte hmalakna fakawm a tih thu a sawi a. India ram chu ram zau tak, hnam ziarang, tawng bakah mi hrang hrang awmna ni mahse, ram inpumkhat leh inlungrual tak kan nih thu a sawi a. Bharat Darshan Tour-a kal tur zirlaite chu zirlaibu a chuang chiah lo thil tam tak an zir tel dawn avangin uluk taka ngaihvena thil thar zirchhuah tum tlat tur leh Mizoram tana hmasawn thil tha engemaw tal rawn hawn theuh tum turin a chah a. Zawhna leh hriat duh an neihte inthlahrung hauh lova zawt zel tur leh hun tha an neih chu bawhpelh lova, hmasawn nana hman tuma theihtawp chhuah turin a chah a ni.

Tun tum Bharat Darshan Tour atan hian District pali- Aizawl, Lunglei, Mamit leh Saitual District-a School 8-a zirlai 100 leh Zirtirtu 8 te thlanchhuah an ni a. He Tour hian ni 6 chhung awhin September 3 atang 8, 2025 thleng a awh dawn a, Delhi-a History hmunhma pawimawh tak takte, Cultural & Heritage Site-te, Sawrkar Office leh Museum-te an tlawh dawn bakah MHA Official-te nen inkawmhona hun an hmang dawn a. Zirlaibu a chuang mai piah lamah thil pawimawh hrang hrang- India ram chanchin, hmunhma pawimawh, hmasawnna, khawtlang leh hnam ziarang hrang hrangte leh Sawrkar inrelbawlnate Bharat Darshan Tour kaltlang hian zirtir tum an ni.

Nimin-a heng mite thlahna hunah hian Frontier HQ BSF, Silchar-a DIG (G) Ahsan Sahedi chuan report pein, BSF chuan ramri venhim mai bakah ram inpumkhat nana hma an lak thin thu a sawi a. Ramri depa awmte tan Bharat Darshan Tour buatsaih thin a nih thu sawiin, hemi atan hian Ministry of Home Affairs-in BSF te chu kumin hian Mizoram zirlaite tana Bharat Darshan Tour buatsaih tura a rawn ruat thu leh hei hi BSF anga Mizoram-a Bharat Darshan Tour an buatsaih hmasak ber a nih thu a sawi a. Hetiang programme tha tak hi chhunzawma, District zawng zawng huamtir a nih ngei a beisei thu a sawi a. Sector HQ BSF, Aizawl-a Commandant (Adm) AK Sharma chuan lawmthu sawiin hun a hmang bawk a ni.