Lawngtlai DC leh Central YLA hruaitute an inkawm

Lawngtlai Bawrhsap Donny Lalruatsanga chuan nimin khan a Pisa-ah Central Young Lai Association hruaitute kawmin hmalak ho zel dan tur an sawiho.

Lawngtlai Bawrhsap Pisa-a an inkawmna ah hian Bawrhsap Donny Lalruatsanga chuan Lawngtlai District-a Tlawmngai pawl lian ber 'Young Lai Association' hmalakna leh hnathawh chhuanawm a tih thu sawiin, Zirna, Ruihhlo do, Hriselna, Khawpui nunphung, Faina leh thianghlimna, bakah Raltlan chungchang leh a kaihhnawihah te YLA leh Sawrkarin thawhhona tha tak an neih thin chu chhawmnun zel a pawimawh tih a sawi a. Hmalam hunah pawh thawkho zel tur leh infinchhuah an ngaihna ah Central YLA hruaitute chu neitu chanchang tlat turin a ngên bawk.

He hunah hian Central YLA hruaitute pawhin an hmalakna hrang hrang sawilangin, Ruihhlo do bikah Central YLA chuan Kumpuan atan Ruihhlo Do an kalpui mek thu te, an hmalakna vangin pawikhawihna a thlakhniam thute, a bik takin Myanmar leh Bangladesh nen ramri thui tak intawm an nihnaah tha thlah lova nasa zawka hmalak tul an tih thu te, Zirna siamtha tura hma an lak dan te, District Hospital Lawngtlai leh District chhunga PHC leh Sub-Centre ah te thawktu an indaihloh nasat ziate Bawrhsap hi an hrilh a ni.

Lawngtlai khawpuiah Raltlan Camp 13 a awm thu leh Raltlan te chhawmdawl nan theihtawp an chhuah thin thu te pawh YLA hruaitute chuan an sawi bakah, Raltlan ni lo, Ramdangmi rawn lutte mumal zawka chhinchhiah an nih theih nan Sawrkar in 'Check Point' siam se an duh thu te an sawi lang bawk a ni.