GST siamthat vangin inhralh that zawk beisei

Mizoram sawrkar-a State Tax Commissioner HK. Lalhawngliana chuan Sawrkar laipuiin GST siamthaa chhiah a tihhniam avangin vantlang mipui tan thil man a tlawm dawn a, sumdawngte pawh in hralh tha zawk tura ngaih an ni, a ti.

Akashvani News zawhna chhangin State Tax Commissioner HK. Lalhawngliana chuan GST siamthatna chu Prime Minister Narendra Modi-a'n Diwali puala ram mipuite hnena thilpek a hlan zulzuiin GST Council hnuaia Group of Minister ten mipui nawlpuiin an hlawkpui theih tura an siam a ni tih a sawi a, ngun taka an zirchian hnuah thilman atanga chhiah an lak thin zaa 28 atangin zaa 18, zaa 18 atanga zaa 12, leh zaa 12 atanga zaa 5-ah te tihhniam a ni tih sawiin, Chhiah tihhniam a nih avang hian bungraw man a tlawm loh theih loh avangin vantlang mipuite tan thilman a tlawm dawn a, sumdawngte pawh in hralh tha zawk tura ngaih an ni, a ti.

HK. Lalhawngliana chuan sawrkar laipuiin GST a siamthat chhan chu Tax compliance a that zawk an rin vang a ni thei tih sawiin, hun reilo te chhung chu GST lakkhawm lamah Mizoram leh ram pum huapin tuar dawn mah se sawrkar laipui chuan hei hi a huam a, rate rationalise a nih avanga an hloh tur te zangnadawmna chu State tin te a la pe leh mai turah a ngai tih a sawi bawk.